明明之前皮雅斯布士南（PierceBrosnan）主演嘅007系列已經叫「新鐵金剛」，今次換咗丹尼爾基格（DanielCraig）係咪應該叫「新新鐵金剛」呢？名唔重要，最緊要係件事有幾新，今集《新鐵金剛─智破皇家賭場》（CasinoRoyale）不但加入成龍式動作場面，仲撈埋王晶式賭片元素，一反以往邦片公式，務求令觀眾有耳目一新嘅感覺。 撰文：戶川淳
由於近年有《叛諜追擊》（TheBourneIdentity）及《3X反恐暴族》（XXX）等系列爭飯食，電影公司覺得手軟腳軟嘅鐵金剛係時候要改頭換面，今次主角換上似實Q多過似間諜嘅丹尼爾基格，無非都係想007變返條硬漢。
棄科技玩拳腳
新一集最大變動，就係007完全唔用以往嗰啲唔等使嘅高科技武器，只靠拳腳同壞人搏鬥，好似開場時喺馬達加斯加捉炸彈狂徒嗰幕，佢同對方喺大廈地盤不停打觔斗穿插，又喺吊臂跳嚟跳去，直情同成龍作品無異，最慘係丹尼爾初嚟埗到，唔好意思唔親身上陣，結果拍攝時被特技人打爆兩隻牙，佢演得咁投入，真係勇氣可嘉。
唔知係咪導演馬田甘寶（MartinCampbell）睇得多港產片，今集除咗成龍功夫外，仲有王晶賭片橋段。今次007瓦解恐怖組織，並唔係用槍射瓜壞人咁簡單，而係要喺賭枱上同恐怖分子首腦兼賭場大莊家利志弗（由麥斯米基辛（MadsMikkelsen）飾演）一較高下。雖然主角喺戲中玩嘅牌叫TexasHold'em，但其實只係變種嘅沙蟹，而且007不斷用怪招偷雞，真係以為自己睇緊《賭神》同《賭俠》，爭在未有「捽牌」同「大埋你枱面隻手」，不過就有「大埋你枱面架車」嘅情節。
反傳統一籮籮
今集鐵金剛仲有好多反傳統嘅地方，例如007唔飲馬天尼飲威士忌、頭髮變咗金毛，不過最令人驚訝嘅係007竟然會喊！！至於片頭播主題曲時，雖然冇迷幻裸女剪影出現，但狂玩電腦動畫特技，都算令人目不暇給，效果唔錯啦！