掌管香港房地產政策嘅房屋及規劃地政局局長孫明揚縱橫官場多年，人脈貫穿政商界，同唔少大孖沙搭晒膊頭好老友，噚日更喺沙田馬場舉行嘅第11屆馬匹拍賣會，同地產建設商會會長、「賭王」何鴻燊等17個富豪級人物夾錢買咗隻新馬，首次晉身馬主行列。孫公做乜咁大膽公然官商勾結？
17富豪每人花約13萬
孫公一向熱愛賽馬，更鑽研出一套個人投注心法，但一直無緣做馬主，今次掹富豪衫尾買馬，都算係十七分之一個馬主，至於有冇機會拉頭馬，就要睇匹馬仔生唔生性嘞。孫公今次同富豪夾份買馬並非私人性質，係以團體「保赤安良」名義買入。「保赤安良、服務社群」係保良局嘅宗旨，「保赤安良」17個富豪成員都係保良局善長，除咗孫公同賭王，莎莎老闆郭少明都係成員。
馬圈中人估計成班大富豪落叠，肯定會大手筆買隻純種靚馬，不過富豪行事零舍唔同，人人以為佢哋重鎚出擊，佢哋偏偏雞仔注，只係以220萬蚊買咗隻5號灰馬仔，除開每人科水13萬蚊有找，可見買馬豐儉由人，刀仔鋸大樹仲過癮。幾百萬買隻靚馬拉頭馬係應份，平平哋買隻「黑馬」，做伯樂嗰種滿足感，隨時開心過贏錢啦。
據富豪傍友透露，班大孖沙講明對估價達500萬元嘅15號匹名種馬冇興趣，原本吼實一匹美國馬同新西蘭馬，但臨場被人截糊，惟有改買5號澳洲馬。呢匹兩歲馬被評為早熟短途馬，馬會成本價約100多萬元。
富豪夾錢買馬經濟實惠至上，私人旗下馬房買馬就大手筆得多，賭王暑假時搵練馬師大摩喺法國購入一匹名駒名為「爆炸」，大摩唔肯透露匹馬幾多錢，只係話身價不菲。今次高官富豪以團體名義買馬，八方希望匹馬生生性性，班富豪贏錢後會捐出嚟造福社群，佢哋錢多，捐啲彩金做善事都唔志在。
李剛睇跑馬大過選委
高官鍾情跑馬仔，中聯辦官員都好此道，今日係選委會界別分組選舉投票日，中聯辦副主任李剛噚日被問到會否為友好催票時，懶輕鬆咁話今日要入馬場。其實唔少馬會會員都有資格投票，李剛喺馬會一樣可以拉票啫，何況京官坐鎮深圳，相信李剛唔敢只顧落注啩。
