恒指上星期繼續喺18600至19100點高位上落，但兩隻重磅藍籌中移動（941）同滙控（005）唔多爭氣，前者創個幾月新低，後者更碌到兩個幾月以嚟低位。連上月中炒到不亦樂乎嘅中資金融股都冇乜表現，好彩有幾隻首日掛牌嘅新股沖吓喜，普羅散戶至有啲細藝。
新股爆炸力咁勁，嚐過甜頭嘅散戶，呢排都醉心抽新股，往年一到12月就會聽到「聖誕鐘買滙豐」，今年應該改為「想食糊抽新股」，睇吓網上留言，可知一二。滙控上星期五收市報140.90元，跌20仙。
喺「香港討論區」入面，網友「直覺」上星期五收市後出post：「滙豐跌到$140，有冇人趁機入貨?」
etchai2002答得好爽快：「炒埋新股，等啲錢返嚟先。」
whwh1016喺144蚊沽咗貨，佢話等位再買番：「個勢好差，會試低啲，138-139。長線應唔差。」
deep_impact就高呼：「nomoneytobuy！」唔通佢啲錢又俾新股「責」住？mj232323似乎對5號仔興趣唔大，佢認為隻股唔係咁好，但係冇解釋原因。
可反彈至145元
滙控上星期二晚發出業績預警，表示對英國嘅資產素質、無抵押個人貸款，同埋美國樓按持審慎態度，消息一出，喺英國上市嘅滙控股價即刻腳軟，第二朝香港滙控一開市亦跌到四腳朝天，收市跌幅收窄咗啲，但都冇咗2.50元。
滙控自11月28日裂口跌穿145.50元支持位後，雖然曾一度反彈，但始終受制144.40至145.30元下跌裂口，上星期二再來一個裂口下跌，星期五更插至最低140.60元，由11月9日歷史高位152元計，已經跌去超過10蚊。圖表上，以近呢兩個月所營造嘅頂部形態之頸線計算，量度跌幅大約係140蚊，上星期五已經差唔多跌夠，加上日線圖同小時圖9RSI見背馳，短線反彈可期，第一個目標睇145蚊。
余文