鄭融開心小丑袋
「呢個袋係上年產品，香港只得一兩個，呢個袋係同款圖案中最大size嘅，好啱我用。我平時需要袋好多嘢，特別之處係大袋附送埋證件袋，方便我出埠工作時用，非常細心，最重要係質料耐用。平時好少見到以小丑作圖案嘅產品，小丑代表開心，而且出嚟嘅效果又唔係太花，隨袋仲附送埋小丑鎖匙扣㖭。」
關心妍巨型愛心錶
「隻錶係Armani嘅RED系列最新出嘅，係Armani送畀我，最特別嘅地方係隻錶有RED嘅標記，你買咗隻錶之後，Armani會將四成嘅利潤捐畀GlobalFund，資助非洲愛滋病計劃，主要嘅救助對象係女性同兒童。隻錶有黑色同紅色，又夠大隻，好容易襯衫。」
容祖兒Leggings天下
「我呢排一定係揀leggings啦，唔知睇乜嘢書睇到嘅，話今年好興呢樣嘢，着條三個骨嘅褲，再襯對leggings，所以我都買咗好多唔同花紋。我買咗唔同顏色嘅，有金、銀、銅色，又有圓點、格仔、斜紋等等。呢一條淨色就係上網買嘅，佢仲係閃面，都幾特別㗎！」
王菀之溫馨星鑽飾
「呢款Chanel星星系列全部人手造，每條都有唔同，粒星星做得唔係好對稱，但我就覺得好特別。至於隻戒指係媽咪送畀我，有兩粒星星，正好代表一個係我，一個係媽咪，不過我哥哥見到又話要夾錢送畀我，等我都唔知兩粒星星代表母女好，定係兄妹好。」
採訪、攝影：王連連、駱華齡、馬建華、張俊銘
