去年無綫半夜重播羅嘉良孭飛的百集長劇《創世紀》，令52萬觀眾連續五個月捱夜狂煲，追捧地產狂人「葉榮添」一生的恩怨情仇。
兩個月前，無綫故技重施，深宵翻炒羅嘉良擔大旗的《流金歲月》。今次情況更轟烈，上月底播出的結局篇，竟風魔58萬觀眾，追睇世紀完人「丁善本」的終極收場。
在炒冷飯時段再次突圍的嘉良，近年轉攻內地，有幸成為中央台的新寵港星，逾千萬酬勞袋袋平安，但回望過去，嘉良至今難忘《難兄難弟》飾演的「李奇」首奪無綫劇帝，更難忘當年苦戰11個月的《創世紀》，贏了軍心但輸了收視；扮男又扮女的《先生貴性》，頻頻轉妝叫他火遮眼。
在無綫經歷過17年的流金歲月，那戲如人生的百味架，除了嘉良之外，相信觀眾也同樣回味。 撰文：朱倬誼
羅嘉良拍過50部以上的無綫電視劇，在長達17年的無綫拍劇生涯中，他曾經成王敗寇、悲喜無窮，箇中的甜、酸、苦、辣也不知嘗盡幾回。
45集的《流金歲月》早前午夜翻炒，掀起夜鬼煲劇狂潮，嘉良因此再次人氣急升，他演的丁善本完美得過份，集靚仔、富有、智慧、孝順、專一、重情重義於一身。嘉良曾經說丁善本是超難演的角色，但難演歸難演，丁善本只是納入他最愛角色之一，卻未能成為最觸動他喜、怒、哀、樂情緒的電視劇，真正令他有這四種feel的，原來是以下四部：
喜
「咪係《難兄難弟》囉，我演李奇時，有好多嘢得心應手、好暢順，睇相嚟講係行運有條路，真係十年唔逢一閏，好難拍到寫得咁好嘅劇本。拍嘅過程開心嘅，每日都笑到好攰，宣萱一笑把聲就哈哈哈，鎮宇又好玩，張可頤又扮得好似，佢好似寶珠，大家好似天生一對，都好適合唱嗰個年代嘅歌。我非常享受拍攝過程，拍得好歡喜，又令到觀眾喜歡，亦都因為呢個劇，令我第一次攞到最佳男主角獎。」
怒
「係《先生貴性》，嗰時係我患肝炎之後拍嘅，本來我想推，但諗吓演員一世人一次，難得有咁嘅機會，拍啦！拍嘅時候，我好易發火，因為我扮圍頭仔，成日大聲講嘢，搞到把聲拆晒，嗰時又係夏天，一日轉幾次妝，又男人又女人又男人。有日拍戲，收廠前唔夠一個鐘，仲有兩場餐廳戲未拍，導演話要轉妝，但轉妝要一個鐘，一定拍唔晒，導演堅持要拍，結果轉完妝cut廠啦，點解佢唔體諒大家咁辛苦呢？係零舍勞氣！但過咗咁多年，我有啲嬲自己，有時有啲嘢唔使咁勞氣，有得扮女人好難得，好彩當年冇推到，如果唔係我仲嬲自己。」
哀
「《創世紀》，因為當時收視麻麻哋，我表面冇嘢，心裏面唔係太舒服，嗰時係邊拍邊播，劇集一路出緊街，一路29點（約182萬觀眾），又唔跌、又唔升，3點不露，TVB咁耐冇試過拍百集長劇，係羅嘉良孭飛，當時對自己嚟講幾大衝擊，但我係劇中主要演員，唔可以俾人感覺有丁點兒放棄或者唔開心，盡量掩飾啦，好彩到最尾都有3字頭（收視30點，約188萬觀眾）出現。其實呢套劇嘅台前幕後都落咗好多心血，當時覺得好可惜，可能觀眾唔想睇咁沉重嘅劇。」
樂
「都係《創世紀》，喺拍攝嘅11個月入面，大家同心合力、盡心盡力演好每一個角色，吳奇隆係台灣人，講廣東話唔正，但佢好勤力，演得好有heart。好多人都好努力演出，大家都珍惜，好多謝Tommy（無綫戲劇科高層梁家樹），佢為呢套劇付出好多好多心血。舊年呢套劇重播，有好多觀眾追睇，估唔到效果咁好，𠵱家湖南衞視重播，係全國同時段嘅收視第一位，𠵱家有咁多人欣賞，真係好安慰、好快樂，亦都證明《創世紀》係好作品。」
闖內地勁賺千五萬
話說回來，又要講講《流金歲月》。當年盛傳嘉良和宣萱拍此劇日久生情，即使現在重溫，也覺得他們的感情戲太真實，但同一套劇，當嘉良與向海嵐談情說愛，卻令人感覺降溫，嘉良笑說：「演戲經驗係宣萱多，無可否認，我同向海嵐都有交流，以當年佢嘅年資嚟講係及格，總括一句，係因為我同宣萱熟啲啫。我都有同宣萱聯絡，大家有睇番《流金》，我同佢都會檢討自己嘅演出，永遠都覺得可以做得好過以前。」
嘉良曾三奪無綫最佳男主角獎，但現在鄭嘉穎也榮升劇帝，原因是無綫「親生仔」、實至名歸抑或蜀中無大將？答案見仁見智，但事實有很多人希望嘉良回巢「賑災」，不少網民在討論區內留言，恨睇他演的拿手長劇，但嘉良說：「我都想返去，有好多好朋友喺度，TVB有搵過我，Tommy私底下亦有傾過，但冇辦法，timing問題，我好多謝大家，希望TVB可以買我喺出面拍嘅劇，《鄭和下西洋》、《昭君出塞》，都係好戲嚟㗎！」
過去三年嘉良專注內地拍劇，還當上中央台的寵兒，目前他正身在杭州拍攝中央台和南京軍區政治部合作、講述軍人故事的30集電視劇。雖然經常離鄉別井𢱑銀，但嘉良贏得名利，估計離巢至今已穩袋1,500萬收入。
嘉良說：「離開TVB之後，成日返內地拍嘢，失嘅係同家人相處嘅時間，但佢哋會體諒，出去發展最大嘅得益除咗收入外，係識到好多唔同嘅人，我對唐國強（內地名演員）都好欣賞，佢做戲修養好，劇本有問題會同導演研究，就算覺得有乜唔啱，導演要求做，佢都會去做。我哋一齊拍《鄭和》時，有次去北京郊區拍嘢，好大風，佢成眼都係沙，導演問佢拍唔拍到，佢話可以嚟；佢對食又冇要求，食得飽就得，喺零度氣溫以下拍外景凍到硬晒，點眼瞓點攰都堅持，佢嘅專業精神令人好佩服。」
攝影：葉君海 服裝：CalvinKlein
場地：LUXRestaurant&Bar
