樂壇新人王浩信（Vincent）話最近天氣涼涼哋最啱踩單車，所以佢同方皓玟（Charmaine）錄完首合唱歌就踩入大埔。入到大埔想醫肚又唔知碇，於是當街攔截街坊問邊度有好嘢食，結果個個都話：「想食好嘢就去大明里啦！一樂燒鵝靚、東江雞嫩、群記清湯腩爽！」佢哋即刻踩車飛去大明里！
記者：林思樂
攝影：陳陶鈞
Vincent'sWardrobe：Password
Hair：Calvin@XenterJut
位於大埔墟的大明里廣場，係大埔墟的中心地帶，呢帶有近30間食肆，好多都長期有捧場客。而附近的東昌街有幾間出租單車舖，各位租車前或還車後不妨行兩步去大明里搵食，包保你食到攬住個肚。
a.30年老字號7斤重黑鬃鵝
Charmaine同Vincent都好鍾意食燒鵝，一聽到有靚鵝食就即刻飛去！一樂開業30年，大埔無人不識，日日都坐滿人，皆因燒鵝皮香肉嫩，老闆話：「最緊要夠新鮮，我哋啲鵝日日賣60隻，唔會有隔夜貨。我哋用7斤重的黑鬃鵝，保證最嫩最滑。」而一樂在舖後自設工場，由清洗、入醃料、風亁到燒烤全部一手包辦，製作用心講究，所以做出來的燒鵝皮香而鬆化，鵝肉夠入味。而燒肉亦是同樣道理，用新鮮豬腩，自己去屠房攞貨，之後由清洗到燒烤都自己做，盡在掌握之中，所以燒肉皮脆到咬出聲，肉質新鮮，唔會過鹹。一樂的小菜價錢好大眾化，大大隻咕嚕蝦球都係$38碟，炸得脆脆哋，食落酸甜但沒有掩蓋蝦的鮮味。
食客有Say
一樂燒臘飯店（26564732）
地址：大埔大明里5號地下
營業時間：11am-11pm
座位：約70個
b.鹽焗雞王 日賣160隻
Vincent同Charmaine見街坊話東江雞好食，又忍唔住過去幫襯。一入到店內已經聞到陣陣雞香，原來門口廚房師傅正用湯淋上碟雞度，Charmaine話：「咿？呢度唔係食鹽焗雞咩？點解變咗上湯雞？」皆因東江雞的鹽焗雞並非用大堆鹽焗，而是用濃味上湯浸，所以雞味濃得來唔會得個鹹字，上枱前再用秘製湯汁淋十幾次，保證食用前香濃多汁。老闆話：「呢個方法我哋用咗幾年研究㗎，仲有我哋4斤重的新鮮雞，肉質嫩滑，冇多餘脂肪。」Vincent食咗一嚿之後話：「好滑！啲雞汁好好味，唔似一般鹽焗雞咁亁爭爭！」啲鹽焗雞咁好食，唔怪得人人枱上都有一碟，1日仲賣成160隻！另外，東江雞的小菜都好出色，辣炒鱔用新鮮黃鱔，好爽口，醬汁少少酸甜，帶點花椒的辣，好惹味。梅菜扣肉鬆化甘香，加埋梅菜汁真係撈多幾碗白飯都得。
大埔東江雞酒家（26502345）
地址：大埔大明里12-14號地下
營業時間：6am-12mn（鹽焗雞供應時間11am-12mn）
座位：約80個
c.絕種懷舊菜 魚唇魚翅可養顏
專食懷舊菜的和暢之風，Charmaine同Vincent盲舂舂走咗入大明里的和暢，入到去先知呢間和暢以粉麵為主，要食小菜就行兩步過馬路去運頭街。Charmaine同Vincent八字頭出世，對懷舊菜認識不多，所以請總廚吳師傅發辦。吳師傅炮製了50年代流行菜式北菇鴨汁魚唇，魚唇即是鯊魚的尾部，是去除翅針的魚翅，含豐富蛋白質同骨膠原，𠵱家已經好少地方食到，因為工序繁複。魚唇要放入凍櫃慢慢浸先夠入味，Charmaine知道可以養顏即刻食多兩啖，「魚唇好滑呀！」
另一個菜式都係魚翅，都係差不多絕種的炒桂花翅。碟魚翅多到似粉絲，隨手都可以夾起一大撮令人好興奮，吳師傅話：「保證全部真翅，因為做魚唇剩低好多翅針，所以索性不計成本大平賣。」
和暢之風（26568871）
地址：大埔運頭街20-26號廣安大廈地舖
營業時間：11:30am-10:30pm
座位：約100個
d.牛專家 面珠又滑又腍
Charmaine同Vincent經過群記清湯腩見到客人多到要坐出門口，又忍唔住入去八吓。一睇餐牌，淨係牛腩都分爽腩同肥腩，仲有牛面珠、牛脷、牛肚、牛筋，甚至牛鞭！呢度最出名牛腩，同中環九記有得揮，好多明星捧場，但係Charmaine同Vincent見到罕有嘅牛面珠同牛脷竟然放棄牛腩，果然識貨！Charmaine一食牛面珠：「嘩！又滑又腍！」Vincent咬住嚿牛脷話：「真係好腍！牛味十足！」飲埋啖湯，「牛味濃而不油膩，好想飲多碗！」但係原來群記不設加湯，另叫淨湯$4一碗。湯底用30斤牛腩牛骨由收工煲至天光，絕不加味精，所以牛味濃郁。
群記清湯腩（26383071）
地址：大埔大明里26-28號地下
營業時間：1pm-1am（星期一休息）
座位：約30個
其他好嘢食
