搞party吧！要有dresscode嗰隻！否則你好人好姐有些衫一世都不會着，例如埃及妖后、阿梅淑女、死神流克、劍俠梭羅、非洲土著……你唔恨試一次嘅咩？年年要等Halloween才可以明目張膽扮一次嘢，而且來來去去幾款鬼，你唔悶嘅咩？
那天聽朋友討論起公司今年忘年派對的dresscode，金色，有點太expected，但依然（無份參加）聽都開心。忽然感歎，好似好耐都冇參加過一個似樣嘅partywithdresscode咯！講起超過10年。
不是期間沒參加過造型派對，只是沒有似樣的，似樣的意思是，人人盡力，各出奇招，不是那種主題「夜上海」──有人着件棉衲出席算數，有人更離譜，着返工的恤衫西褲來，還強辯說「喺上海街買的，哈哈哈！」──的派對，玩得咁勉強，不如咪玩，最hurt的是這些求其打發的「害群之馬」，累挖空心思尊重場合的人，因為顯得「太落力」而核突咗。
在我20剛出頭的年代，「進念二十面體」給了我很多東西，除了友誼與自我肯定，還有很多很多美好的派對。富想像力的dresscode，出盡法寶的賓客，讓之後很長時間的一些同類型party相形失色，像那間永不回來的，我們私有的Club54。
出題的人請注意
先定個dresscode吧，好的題目是成功的一半，當然只得一半，另一半還得靠搞手人緣、夠不夠早通知讓大家準備和賓客們有多捨命陪君子，但好的題目是成功的一大半，所以，還是先定個dresscode吧，值得由端午節已開始構思……
1. 別揀個太易的dresscode：例如「紅」、「黑白」、「中國風」或者「球迷世界」之類，熟口熟面的題目吊不起大家的胃口，唾手可得的戲服難怪令人掉以輕心，結果賓客十居其九都是在party前半小時才回家「睇吓有乜咪着乜」，最後自然沒有睇頭。唯一好處是人人跟到吓，犯規棄權的自然較少，大合照留念時的一片紅海或一片球衣海倒也壯觀。
2. 別揀個太難的dresscode：假如是「雛鳳鳴之夜」，請預咗場面冷清，有心的未必有力又知碇搵得到龍鳳大戲褂，有心有力的也未必夠時間找師傅度身訂做再送回大陸蘇繡。
3. 別揀個太難明的dresscode：「奇斯洛夫斯基之夜」是乜東東？得你自己明，要對每個人專登解畫一餐就冇癮啦。「秘魯之夜」？秘魯的人平時着乜嘅呢，死啦，十幾年冇睇「環球小姐競選」唔記得咗㖭。
4. 別揀個太無發揮的dresscode：「肥肥之夜」幾得意吖，但你咪得到40個肥肥囉，頂多加多5個比較好想像力的賓客扮欣宜（3個收身前，2個收身後），搭多3個鄭少秋，冇咯，幾悶？要搞這種方向不如改少少搞《翡翠歌星賀台慶》，起碼仲有人會扮吓阿姐嘟嘟阿叻志偉先吖，冇時間搵衫的人可以打個煲呔扮陳志雲，連你阿爺也可以到場玩埋一份做六叔，玩之嘛，可以脫離現實，狄波拉盧David琴姐盧海鵬楊盼盼統統都可以返番嚟，你話幾壯觀，至於我，我一定要反串扮利孝和夫人，我喜歡公主袖的旗袍。
5. 記住有獎有罰：凡多於半數賓客投訴未盡全力的人，罰款500，即傍，用來做全場互相投票選出的bestdress大獎彩池，獎勵盡力的嚴懲偷懶的，外面的世界未必有咁理想，但起碼在我們的party裏是。
ThisMasquerade
好，終於輪到我最喜歡的一部份了，有dresscode的party，趣味除了來自party本身，其實還有些可能比主菜更美味的配味──事前與事後。
試想想，Peter着到成個登陸月球的太空人咁款，請問佢點搭車嚟？地鐵還是巴士？Dorothy恤咗花拉頭着住高衩體操衣加皮褸扮Madonna，的士佬會同佢講乜？搭lift時見到人哋一家大細出街食飯有乜反應？還是一路着條牛仔褲遮住對髀直到你屋企門口㩒鐘前才拿拿臨衝入垃圾房除低？
還有之後，酒酣耳熱之後，還要不要轉個場來個partyafterparty？成隊蝴蝶夫人，如妃娘娘、卡幫教父、湖北燦哥、軍曹Keroro可以操去邊，酒吧K房通宵麥當勞還是在街邊食雲吞麵？
當然，如果你是衫癡如我，更早就可以享受籌備costume的過程，去國貨公司搵還是搵片場租，要不要找上海師傅訂做？美人魚衫佢又識唔識車？還是逛街逛街再逛多啲街，希望從名師設計中找到答案，這個一點也不奇怪，話係dresscodeparty啫，都有少少時裝touch好啲嘅，說起來，近年那個大牌子大設計師不是從各行各業各地方各團體各式造型制服民族衣飾裏借靈感的，是他們將第二代的再創作還給dresscodeparty的時候了。
距離平安夜，剛好還有兩星期，係時候將份報紙放低，出去搞搞嘢啦。
本周（年）partydresscode建議：
華星唱片之夜/「露少少」之夜/TimBurton之夜/大陸人之夜/水晶燈之夜/動漫展之夜/斷背山之夜/RoyalFamily之夜/星星月亮太陽之夜/新派古裝片之夜/LionKing之夜/音樂頒獎禮之夜/夠膽的話還可以有LeslieKee百人甩褲之夜
Textby黃偉文
