看通（1059）對上星期破咗條小型下降軌，唔講技術分析，3大理由，要買看通。呢期市場翻兜祖國3G概念，電訊科技股有理冇理炒到癲，看通屬同一個sector，股價兼喺1年低殘位，資金炒同氣連枝，遲早辣着看通。
看通單喺06年度（12月止），嚟自祖國銷售額就高達8.7億銀（佔總收入64%），而祖國即將推出3G牌，加埋08奧運及上海世博盛事，推動電訊行業投資增長，看通喺祖國業務亦欣然受惠。所以，祖國推3G，對看通嚟講，係實實在在嘅商機。
看通06年度純利增長24%到3.3億銀，PE都係講緊3倍幾，加埋真金白銀貼近7厘息，高息低PE嘅科技股，仲邊處去搵！就當看通07年度PE維持3倍水位，現價（0.445元）翻一番，預期PE都係講緊6倍低位，兩個字：「抵買」！
麗豐價殘值得昅實
麗豐（1125）應該係少數仲企喺250日線樓下，兼且仲喺1年低位浮沉嘅祖國房產股，價殘不堪，已經值得昅實。又麗豐最新NAV0.65元，連埋集團手頭樓面上千萬平方呎土儲，齋計佢每方呎升值一張紅衫魚豆泥價，已經可以增值10億銀。麗豐實際NAV可以秤到上1蚊水位，現價（0.33元）折讓高達67%。買麗豐，要長短打，一注睇位炒波幅，一注咬實長揸，皆因呢類超殘股，一開車會望塵莫及。
錢雋