誇喇喇，全年賽馬盛事今日在沙田馬場舉行，節目多囉，十一點幾入場就啱啱好。最後一場（第九場）之後，更有閉幕禮，舉行煙花表演，馬會直情寫信畀各位馬主，請佢哋在尾場賽後（約五時五十分）攜帶子女入場，欣賞「萬花筒式煙花匯演」，此乃全亞洲首次演出，好多人都未睇過，左丁山就一定睇埋先至走。
睇「國泰航空香港國際賽事」，睇場內各種表演，係餘興啫，注意力及主菜當然係第三場國泰航空香港瓶（二千四百米），第五場國泰航空香港短途錦標（一千二百米），第七場國泰航空香港一哩錦標（一千六百米）及第八場國泰航空香港盃（二千米，全日重心）。過往麥通酋長與日本人視國際賽為提款機，專派馬嚟香港贏巨額獎金，呢兩年香港馬實力橫強，力抗外敵入侵，今日本地馬會唔會繼續威風呢？可慮者乃本地馬王「精英大師」、「爪皇凌雨」、「牛精福星」等都曾有傷病纏身，未知可否及時奮起耳。
老友奧馬聖專程自英國回港，參加香港國際賽，綜合馬主N、奧馬聖及馬房消息，第三場六號馬英國馬后「占卜」實力高出一皮，騎師戴圖理好有信心贏。第五場跑短途，一號「兼併目標」應該好有機會，但因體內含禁藥，執筆時唔知呢隻馬是否退出，若然，七號「精英大師」執到靚位二檔，仍可稱王，拖八號「新力升」，二號「大漠霸主」。
第七場一哩錦標，十四匹馬出賽，本地馬佔九匹，相信會係地頭蟲，韋達雖然唔係大賽騎師，今日有希望憑六號「好利威」威番一次嘞，腳拖告東尼馬房一對馬，一號「牛精福星」，五號「金碧明珠」以及三號愛爾蘭嘅「妙得美」。第八場一號「爪皇凌雨」，霍利時與杜鵬志講到話冇得輸咁滯，拖法國馬八號「自豪」，四號「終身美麗」，二號「爆冷」，七號日本馬「賞月」。
以上各場心得，大家贏咗唔使多謝，輸咗千祈唔好鬧。適逢國際大賽，馬場就人頭湧湧，投注冇平時咁容易，兼且人多聲雜，臨場刨馬唔得專心，今日講求娛樂算嘞。