米是中國人的「偉大」食糧，細細個就聽阿媽話，最緊要有米氣落肚至食到咁高咁大。不過，如果餐餐淨係對住碗白飯，都咪話唔悶！好彩家陣米都識變面，一時變草餅、一時變米通；而事實上米都分好多種，各有不同營養價值；想食得開心又有益，真係揀米煮飯都要有攻略㗎！
記者：趙珮倩
攝影：陳偉強
示範：名廚導師馮志國 http://www.thechef.com.hk（電話：23322038）
爆芝紅米糰
價錢：$10/3人
需時：35分鐘
材料：紅米1杯、白米1杯、1杯水、忌廉芝士100g、牛油100g、糖50g
做法：紅米洗淨，浸一晚水。紅米瀝水後，混合已洗淨的白米放飯煲，倒入1杯水，煲成飯。忌廉芝士、牛油和糖拌勻成餡料備用。將紅米飯放手心輕輕壓平，加入餡料，搓成糰狀，再用保鮮紙包好定型，之後放入雪櫃約5分鐘。食之前蒸熱3分鐘，吃起來就會有「爆芝」的效果。
朱古力米通
價錢：$10/3人
需時：30分鐘
材料：冷飯2碗、溶朱古力200克、花生粒少許
做法：將冷飯用水洗鬆，瀝亁後放白鑊慢火炒15至20分鐘，成米通。將溶朱古力倒入器皿，再放入50克米通及花生粒拌勻，存室溫下約5至10分鐘，待朱古力凝固即可。
貼士：炒米時動作要快，不停兜，否則很易黏底。建議用厚身的鑊炒米，會比較耐熱。
黑糯米草餅
價錢：$10/4人
需時：1小時
材料：1杯黑糯米、1/4杯糖、1/2杯水、鷹粟粉適量
做法：先用亁磨器將黑糯米打磨約1分鐘，成粉狀。鷹粟粉蒸20分鐘，製成手粉備用。將黑糯米粉混合水和糖拌勻，猛火蒸20分鐘，待冷卻後變成草餅皮。將適量的草餅皮輕輕搓成餅狀，拍上手粉即成。
紅寶石炒飯
價錢：$30/4人
需時：15分鐘（未計煮飯時間）
材料：1杯黑糯米、4杯糖、2杯水、鷹粟粉適量
材料：白飯2碗、薑米1茶匙、紅棗4粒、蓮子去芯6粒、淮山半両、芹粒3湯匙、馬蹄2粒切粒、百合1朵、蛋白2隻，鹽/雞粉少許調味
做法：薑米/紅棗/蓮子/淮山/芹粒/馬蹄粒/百合汆水瀝亁備用。白飯先放鹽和雞粉調味，炒熟蛋白，再炒鬆白飯。最後將所有材料兜勻1至2分鐘。
貼士：如用冷飯炒，可先將飯蒸熱1分鐘；或在炒飯時灑上少許酒，兩者皆可令飯粒更鬆。
一樣人食百樣米
白米唔好出力搓
白米雖然白白淨淨軟腍腍，靚仔又好食，但營養價值就唔夠糙米高，原因係喺製白米要經過打磨，此一過程，會將米粒最有營養的胚芽部份輾去，最後營養成份也幾乎只剩下澱粉質。
點煮：洗米時別用力搓揉，次數也不宜過多，以免洗掉維他命和礦物質。以1:1比例的米和水煮飯，先浸15分鐘讓米粒吸收水份，飯才有彈性；若想更甘香有光澤，可加少許植物油。飯熟後焗10分鐘，會更鬆軟可口。
紅米至啱溝嚟食
紅米是未經打磨的糙米，留有較多未被輾磨的表穀，所以色澤較深，含豐富蛋白質、礦物質及維他命B，其中纖維含量更是白米的3倍，營養價值比白米高，有助降低膽固醇、加速腸臟蠕動，不過口感較粗糙。
點煮：紅米最好先浸一晚。紅米粗糙沒黏性，較難入口，宜溝白米食用，以1:1.1比例的米和水份量煮飯即可。
黑糯米營養豐富易致肥
黑糯米含有極豐富的蛋白質、脂肪、多種纖維，又有多種礦物質如鈣、磷、鐵、鎂、鋅等，還含有多種氨基酸，有助促進血液循環，滋陰補腎，益氣補血。正因佢咁有營養，食得太多好易肥㗎，小心！
點煮：黑糯米沖洗後要浸至少4小時。同紅米一樣，宜溝入白米，以1:1.1比例的米和水份量煮食便可。
