無綫近年力捧黃宗澤、吳卓羲、林峯、鄭嘉穎和馬國明五位新紮小生，在羅嘉良眼中，各人風格各異，由嘉良評評後輩，且看哪位是他的心水上位人選。
黃宗澤沉實大體
「佢幾沉實，睇佢同胡杏兒嘅新聞，佢處理得唔錯，都幾大體，會講吓笑，𠱁吓人開心，咁件事又過去啦。睇佢演戲呢，佢唔會做啲嘢譁眾取寵搶鏡，係做好本份，好可取。」
吳卓羲形格俱備
「佢好尊重我，有次喺Joyce撞到佢，佢以為我拍長劇，仲話『你返去呀？希望同你再合作呀！』佢外形幾好，有潛質，佢有佢性格。至於話佢跳舞點樣，以我自己經驗嚟睇，以前我都試過唱歌演戲，但handle唔到，所以當時咪死囉，分配好緊要㗎，結果自己選擇放棄唱歌先。吳卓羲遇到呢啲難題，就要考慮吓點做。」
林峯演技躍進
「佢做《女人唔易做》有進步，拍《流金歲月》時，佢當我係個大哥哥，會打電話同我聯絡，佢對我唔錯。林峯，要把握好每一次機會，我好期待睇佢嘅《歲月風雲》。」
鄭嘉穎經歷搭夠
「我冇同佢合作過，亦都因為自己唔喺香港，睇唔到佢嘅演出，但知道佢𠵱家有好多機會，咁佢以前都有好多經歷，見佢𠵱家咁都戥佢開心，相信佢會好好把握。」
馬國明黑馬之選
「佢係一隻黑馬，佢係幾乖、幾聽話嘅藝員。佢攞咗個飛躍進步男藝員獎，恭喜佢，佢有前途嘅，佢個樣成熟啲，都幾好、幾舒服。」
