發展商賣樓最緊要有人氣，最好多人到迫爆玻璃，尤其幾個樓盤同時開售，更加唔可以輸人輸陣。一位讀者就喺討論區裏面搵到料畀我哋，佢係《香港討論區》發現網友Veggy「自爆」話，佢女朋友曾經做「媒」，喺新樓銷售處扮客睇樓，乜都唔使做，齋坐，日薪就有幾百蚊，仲係即日用現金出糧。
Veggy話：「呢份咁筍嘅part-time，係佢女友個前同事介紹，全日只係行行企企扮買樓客，但就完全唔知係發展商，定係經紀出錢做勢請佢，無無聊聊做咗一日，覺得悶過頭，跟手就無再做喇！」
行行企企就有糧出，引起唔少網民興趣，網友「龍明無幽郎」講：「呢類外快多數只會請女人，皆因『女友/老婆』見到其他女人買，就會迫佢哋啲男人，跟住就有蠢業主照跟。」另一網友verysuper回應：「我出埋一家大細更似買樓客，收順啲人頭計七折啦！」Mingkk更說：「咁會唔會好似fans咁，大聲啲多幾十，喊出眼淚多幾百，失禁多幾千咁呢？」
長用會冇乜成效
據地產業內人士透露，新盤請「媒」扮客絕對唔出奇，但通常都唔會係經紀做，事關佣都未夠分，又點會畀錢搵人做勢呢？據佢所知，一般係發展商旗下嘅直銷代理畀錢做勢，但呢招只可用一兩次，長用則冇功效，倒不如請幾個模特兒做show，再唔係就搞到個盤成個嘉年華會咁，仲有效！