屆指一算，仲有唔夠廿日就到普天同慶嘅聖誕節，有冇諗定買乜做聖誕禮物呢？冇諗唔緊要，若果今年想搞搞新意思，近日網上討論區《XocatII討論區》就住7隻新股搞咗個投票，讀者大可參考網民意見，揀番隻新股、又或者喺首日掛牌追番隻。
最多人想收中交份禮
截至噚晚，最多人選「順德股神」、恒地（012）主席李兆基有份入股嘅中國交通建設（1800），佔總投資票人數嘅36.59%；第二最受歡迎新股係錦江酒店（2006），有成21.95%嘅人揀佢；中國通信服務（552）就差啲，只有12.2%，四叔同樣有入股嘅中煤能源（1898）就有14.63%人揀。富豪Reit就最少人揀。
有好多網友都話，其實個市升成咁，隻隻都有興趣，隻隻都想抽，其中網友hklistco好具體咁講：「會用大約66%嘅資金申請中交孖展，剩低嘅資金再分3注，分頭出擊3隻新股。」網友peninsula就話：「我會抽15手中交，同埋30手錦江，料可抽到1至2手……其他新股我都會抽㗎！」有人希望可以賺到餐飯仔喎！
睇番實際超額倍數，最受網民歡迎嘅中交，雖然隻嘢size較大，但係公開認購超額配售又真係超成200多倍，隻錦江又係過硬100倍，反應真係唔錯。早幾日里昂出咗份報告，話喺咁多隻新股中，最睇好嘅都係中交，又話獨市生意有前景喎！不過，𠵱家最擔心嘅唔係反應，而係擔心保薦人見個勢好，將個招股價攞到盡，搞到份聖誕禮物縮水就唔好啦！