香港人買樓，大都鍾意買新樓，貪佢設施多，不過大部份嘅廳房都比較細，對一啲家庭觀念重嘅買家就唔係咁啱用。
好似最近成交嘅旺角運動場道京華大廈頂層B室，聽中原地產謝金講，買家係喺香港住咗廿幾年嘅印巴籍人士，因為佢屋企有好多人，一直都想搵一個大單位，可以全家人住埋一齊，但係睇咗九龍區好多樓，發覺新樓嘅大單位啲廳房都好細，至於九龍塘啲屋夠大，但銀碼太大，唔係咁易負擔。
睇嚟睇去，終於睇到65年入伙嘅京華大廈，有個建築面積大約4000呎嘅單位，有5間好大嘅套房、另有工人房，同埋有200呎露台，再加2000呎天台，好啱心水，雖則樓齡高啲，但都即刻一擲1063萬元買咗。
謝金話，唔知實際上呢個大家庭會有幾多人，不過聽買家講，佢哋好鍾意成個大家庭一齊住埋。
呢個單位原業主都係一個大家庭，喺96年1308萬買入，𠵱家蝕咗245萬元。