樓市唔夠鑊氣，買家入市意欲弱，代理行為咗鼓勵前線員工跑數，都係要用番最實際嘅終極一招，就係現金獎賞。美聯前副主席張錦成自立門戶開檔嘅盈富物業，上個月搞咗個「369大行動」，做到30萬數嘅分行，獎3000蚊，60萬就6000蚊。結果係點，喺16隊營業隊中，半數達標，最勁係火炭駿景園分行，一個月做到120萬數，攞到萬二蚊獎金，成為盈富開檔以嚟第一間百萬分行。
盈富物業主席張錦成話，駿景園分行開咗4至5個月，因為做到沙田豪宅成交，所以成績最勁；佢補充，排包尾嘅分行，都可以做到收支平衡。新界豪宅有得做，佢哋嗱嗱聲喺大埔嘉豐花園租咗個舖，今個月下旬就開張。
張錦成話，今個月會力攻一手盤，前線做到兩房單位有2000蚊獎金，三房3000蚊，特色戶就有5000蚊。另外，張錦成早前獲公益金委任為元朗區公益金之友，而公司呢排又順風順水，佢肯定開心到飛起。