被傳媒譽為「香港畢菲特」嘅恒基主席李兆基早前話過，炒股好過賣樓，咁新鴻基地產噚日舉行股東大會，華華見到郭氏三兄弟，梗要問問佢哋點睇，其他熱門話題都請教咗郭氏兄弟，包括全城熱爆嘅新股潮。
二佬郭炳江話，新地本業係以地產為主，唔係個個人都好似李生咁精明，佢哋就會繼續專注地產，唔會改變作風；三佬郭炳聯補充，話集團都有好少量嘅股票投資，但作為長線持有，回報都幾好。之前幾日，新地沽咗啲富聯國際。根據年報，新地持有富聯19.9%。
聖誕新年即將來臨，咁佢哋有乜願望？大佬郭炳湘答得好官腔，佢話希望睇到香港經濟發展好，經濟繼續蓬勃，而香港市民嘅就業同收入都繼續增加。
支持煲呔曾連任
其間有記者問到政治問題：「支唔支持曾特首?」郭大佬話曾特首以往一直做得好好，所以會支持佢連任。咁對於政府擱置推行銷售稅，二佬郭炳江認為政府自有理由將其押後，但本港仍需要擴闊稅基，因為稅基的確狹窄；本港利得稅收入中，六成來自全港首800家企業，但呢個數字只佔本港整體企業0.1%；同樣本港340萬名就業人口中，只有120萬人有交稅，而當中首10萬人繳付入息稅金額，佔整體入息稅六成；隨住本港人口老化，醫療福利開支繼續增加，今日好市，投資收入增加就冇事，但日後有乜風吹草動，問題就會出嚟，要審慎考慮。至於點樣擴闊稅基，佢話離唔開十樣嘢，包括徵收離境稅、漸進式遞增稅率等，各有利弊，佢亦唔想評論。
對於港府正進行嘅財政預算案諮詢，大佬又係答得好官腔，話相信政府會研究清楚，為香港前途作好決定；但佢就冇提任何具體建議。
[email protected]