將軍澳撻定潮擴散

將軍澳撻定潮擴散

今年入伙新盤大部份都要蝕住走,市況淡靜,樓價炒唔起,固之然係因素之一,樓花入市價去到天咁高亦係致命原因。好似將軍澳今年兩個先後入伙嘅新盤,年中君傲灣經歷一輪撻定勁蝕之後,𠵱家就到都會駅,好多等住上會嘅放盤,即使肯蝕15%都仲要畀買家㩒價。
舊年都會駅賣樓花,呎價五千、六千、七千咁去,彷彿呢個區97年摸頂價係咩水位已經唔再重要咁。為咗溫故知新,就以東港城為例啦,97年頭開賣,首批平均價已經四五千銀一呎,後尾呎價都去到六七千銀,部份甚至過8000蚊,𠵱家咩嘢價位?利嘉閣曾慶望話,屋苑7座高層B室,97年335萬元買入,呎價5630元,應該係比較早期買,唔算認真摸頂,最近187萬元賣咗,勁蝕148萬元,貶值44%。
有咩啓示?讀者自己參詳啦。