陳冠希上海出招　出大長針賣大麻

上星期突然收到來自Nike嘅電話，邀請《蘋果》到上海採訪陳冠希（Edison）開新舖，原來Edison同NikeCrossover的「潮流習作店」正式開幕。店名簡約地叫ACU，成為全中國第一家「高端」SneakerBoutique，何謂「高端」？簡單點解作「潮流」或者「別注」好了，講到咁High，又點少得請猛人出席？Edison天大的面子請來藤原浩、Stash、Nike總公司最高領導人等到賀，再加上全國潮流傳媒雲集，可見今次Nike真係對ACU非常重視。國內第一間「高端」波鞋舖，玩乜？原來出大長針，Sell大麻！
記者：羅灝汶
攝影：陳偉強

中式HipHop潮舖全國第一家

ACU即acupuncture（針灸）同acupressure（針壓法、推拿）兩個英文字嘅字母簡寫，名稱雖然是英語，但內在意思就非常國產。點解用針灸、推拿做店名？原來有段古：3位CLot－凝結集團嘅主力成員Edison、鍾俊腱（Tom）同陳奐仁（Hanjin）都係極愛腳底按摩、針灸推拿嘅朋友。「針灸足道係中國文化嘅精髓，所以ACU就係要將中國潮流文化發揚光大，同時亦代表我地對中國文化嘅敬意，絕對係一針見血！」ACU店內主力售賣「別注」潮鞋，不過一樣會出售其他牌子潮物。店內想當然用上自家品牌Clot為主打，推動「中國式Hip-Hop」，而進駐上海亦別有用心，陳奐仁：「上海係內地年輕人文化中心，選擇喺上海開業，希望可以打開中國市場，未來將會喺北京、廣州等地開店，另外都會將自己設計嘅波鞋同衣服放上店舖售賣，而Edison更加會貢獻出一啲自己收藏嘅限量版玩具、T恤出來，令到店舖更多元化。」收到！即係上海只係試點，嚟緊同胞受落一間開完又一間，準備食潮流大茶飯。

●店舖標誌，十分中國書法化，唔講都唔知係ACU！

●室外氣溫只有7℃嘅上海，依然有大量Fans撐場等見偶像。

●長樂路一早已經有不少年輕人等待開舖，場面墟冚。

●店內Sales都穿唐裝着波鞋，真係想玩中外Crossover呢。

聽Reggae大麻Sell新鞋

今次ACU開業當然有新鞋推出，要數限量之最，一定係由Edison、Tom同陳奐仁一同設計嘅NikeRastaPackDunkPresto同NikeRastaPackWoven波鞋。Edison：「我自己一直都好鍾意聽Reggae，非常喜歡佢夠迷幻；而民族打扮同大麻就最能夠代表呢一種文化，所以用上RastaPack呢種紅、黃、綠嘅配搭，再用上代表『大麻』嘅麻布去創作呢兩對鞋。」得到Nike大力支持，DunkPresto同Woven都首次加入麻布，DunkPresto鞋頭同鞋側都用上麻布製作，而「關刀」一剔部份更加有藤原浩御用鱷魚壓紋，兩人關係果然非比尋常！兩對鞋預計2月公開發售，暫時只限量各出24對，「Allforfriends&familyonly！」
除咗新鞋，ACU都有其他衣物品牌同Nike波鞋售賣，不過相比起香港某些貨品會比較貴一點，而且「別注」鞋款都不多，希望店舖其後會有更多選擇，唔好令一眾Fans失望啦。