網上討論區總係有啲人不斷話樓價好貴，即使03年「沙士」期間有啲市區新樓賣到2000幾蚊呎，都仲係貴，究竟要咩嘢水位嘅樓價先唔算貴呢？可能永遠冇答案。或者換另一個角度去諗，乜嘢水位嘅樓價先買得過呢？一個1400幾呎大型屋苑單位，賣250萬，1700幾蚊呎，諗唔諗得過？用上車盤嘅價錢住過千呎大單位，天水圍嘉湖山莊幫到你。
美聯區經黃國良話，嘉湖山莊各座相鄰單位都可以打通做相連戶，由千零呎到1600幾呎都有，市價每呎約千七至千八蚊，大部份樓價唔使300萬，好似啱啱賣咗嘅景湖居10座中層G加H室，1418呎，賣價250.8萬，呎價1769元。
𠵱家屋苑相連戶放盤約有20套，集中景湖居同麗湖居，坐向同景觀都比較好。