來到年底，香港玩具界動作多多，早兩星期剛舉行過的「第一屆亞洲玩具博覽會2006」，較着重於ShowGirl同玩具展覽，推出新玩具並唔多，而今日開始的玩具界盛事「香港玩具節」就以新產品為主。今年玩具界突然殺出多一個玩具展，好多人都話好混淆，結果擧辦多年嘅「香港玩具節」今年索性改名叫作「香港聖誕禮物玩具節2006」，打正旗號叫人入來買「禮物」，Figure玩具多年來都主打男人市場居多，不過今年各龍頭大哥特別為會場設計一系列「冧女」Figure，佢哋話今年女人大晒喎！
記者：羅灝汶
攝影：陳盛臣
雪橇狗金屬兔齊冧女
喺本地玩具界，Husky×3嘅Kevin相信無人不識，Husky更已進佔到台灣、日本等市場，未來大計更要打入時裝界㖭。與Kelvin份屬好友嘅UltraDesign主腦人超人，同樣係玩具界中堅分子，今次兩位大哥就分別推出新作品，Kevin同超人齊聲話：「今次會場玩具一定係冧女！」Kevin：「Husky已經推出到第9代，整個系列更加故事化，第9代HuskyKingdom係主打力作，設計上有王子、公主、賢者、雪龍等等人物，大玩可愛RPG形式。其實未來第10代至12代我已經設計好，到第10代會嘗試加入其他本土設計師人物，令角色更多更豐富！」另一邊廂，最愛金屬設計嘅超人就推出一系列手製金屬玩具，當中角色主打有兔仔、原著1、2號，同一系列手製銀器。超人：「有女Fans知道我會推出銀器，就同我預訂咗好幾條。我係業餘搞玩具設計，所有作品都係以質取勝，並唔會大量生產。我自己製作玩具都係去五金行買材料，所以每款玩具都係只得一隻，收藏價值比夠高。」另外，本地玩具龍頭之一嘅QeeToy都有會場例定玩具推出，包括聖誕版QeeToy、聖誕版ChocoGreen公仔等等，同樣係冧女為主。
限定BE@RBRICK搶死人
今次玩具節依然得到好幾間玩具商支持，推出了多款會場限定玩具，最值得留意就係由MEDICOM嘅兩款會場限定BE@RBRICK，兩隻BE@RBRICK係剛剛於12月初日本東京舉行嘅「第23屆WorldCharacterConvention」首次推出發售，今次成為「聖誕禮物玩具節」限定商品。兩款分別係100%BE@RBRICKJACKSKELLINGTON同埋400%BE@RBRICKJACKSKELLINGTON，主角依然係《怪誕城之夜》主角阿Jack，今次佢化身為一大一細BE@RBRICK。阿Jack出晒名係冧女極品，相信今次都唔會例外！除咗阿Jack，BE@RBRICK另一冧女大作就係2007Valentine100%BE@RBRICKSET，男仔帶女朋友去行玩具節今次實破財！
女仔點睇？
