對用煲仔上菜的菜式特別有情意結，明知辣手都要徒手打開蓋，為的是開蓋一刻惹味又熱辣辣的白煙撲鼻蒸面的一刻。當然要天寒地凍在大牌檔食先夠風味，而且今時唔同往日，喺大牌檔都可食盡料靚又矜貴的煲仔菜。
記者：方綺君
攝影：林栢鈞、何家亮
Model︰Yuki、Conrad
用生鐵煲煮肉最香
因為做大牌檔風味的美食，所以就叫做「大記」。大記負責人鄭生說：「簡單又直接的名字，名改得有意思，菜式亦做得出色，所以大記可謂雄霸西環士美非路熟食中心，整層的熟食中心接近一半舖位都屬於大記。」雖然大記不是傳統的冬菇亭或街邊大牌檔，但每逢晚市都會逼滿客和有等位情況，熱鬧得同大牌檔沒有分別。大記的食物出品絕不求其，鄭生亦教識咗我煲仔菜唔係淨係用瓦煲上咁簡單，他說︰「生鐵煲煮肉最香，要保存食物中水份用金屬煲最好；瓦煲容易蒸發水份，香味比用生瓦煲更好；而砂煲就適合用於煮魚。
海皇雲吞雞煲翅
$188/全隻，$140/半隻
似砂鍋雲吞雞，新鮮雞用上湯浸煮逼出濃濃的雞香味，再放入雲吞及翅同煮，一口雲吞、一口翅、一口湯放入口，香濃的雞味滿口，大牌檔都可以食得咁豪。
亁隆一品盆菜煲$168
個名有「一品」，一聽都知屬上品，同盆菜一樣，瑤柱、冬菇、炸魚蛋、大蝦、燒肉樣樣齊，上菜時用火爐一路煲一路食，不過逢星期五至日及公眾假期先供應。
砂鍋半煎煮海上鮮$88
半煎煮是潮汕的煮法，海鮮落煲煮前用粗鹽起鑊略略煎一煎，惹味之餘煲出來更香，海鮮會因應當日的新鮮貨而每日不同。
喇沙醬海皇斑塊豆腐煲$48
帶子、蝦、魷魚，咁多種海鮮，用瓦煲煮就最好，可以保存海鮮的水份，放入喇沙醬煮亦唔會蓋過海鮮的鮮味，仲可以用汁撈飯。
生逼中山魚頭煲$68
「生逼」即是用中火半煎魚頭，再蓋上鑊蓋煮熟逼出海鮮的原味，比用滾油炸魚頭更能保存魚的水份，唔會亁爭爭。生逼後的大魚頭用芫荽、葱、蒜頭等爆香，煲蓋一掀開就是撲鼻的香味。
睇路搵食
大記（28193750）
地址︰西環士美非路12號市政街市2樓熟食專區
營業時間︰星期一至日7:00am-12:00mn
座位︰250至300個
交通︰中環地鐵站乘的士約$30
強身健體鹿肉煲
中國人冬天要補身驅寒，帝苑軒的滋補煲仔菜就推出鹿肉菜式。鹿肉是著名的補品，甘性溫和，能禦寒、補虛弱、益氣力、強筋骨和潤血脈，而且含豐富蛋白質，脂肪屬於中等，絕對適合任何年紀的人食用。總廚蕭師傅話︰「天寒地凍食補品最啱，鹿肉和鹿筋尤其對老人家有益，因為鹿肉健康，所以多食亦唔會過膩。」除了補身的鹿肉做主打，另外亦有多款新煲仔菜式包括當歸雞肫竹絲雞煲等。
山瑞群鹿柳煲$228
山瑞是屬於龜背類動物，類似水魚但體積較大隻，肉質亦較水魚尤佳，醃好的山瑞略走油後就可以和鹿柳齊燜，鹿柳肉質似牛肉，不過脂肪比較結實，有𡁻口又不會過韌，蒜香和醬油味道配搭絕佳。
鮑汁鹿筋扣鵝掌煲$218
鹿筋的處理過程較繁複，要浸水3天待軟身後才可烹調。口感煙韌，似食花膠，不過蕭師傅話過火的話，鹿筋會失去彈性，所以控制火候好重要。
當歸雞肫竹絲雞煲$128
竹絲雞少脂肪，所以煲出來的湯水少油較清，加入當歸及杞子，師傅話啱晒女士們補身食用，冬天皮膚都滋潤啲及無咁亁燥。
睇路搵食
帝苑軒（27242666）
地址︰尖沙嘴麼地道69號帝苑酒店低層B2
營業時間︰星期一至六11:30-3:00pm、6:00pm-11:00pm
星期日及公眾假期10:00-3:00pm、6:00pm-11:00pm
座位︰190個
交通︰尖東九鐵站C出口