「ITU國際電信展」在香港舉行，係今年展覽盛事。曾特首喺《信報》、「新城財經台」聯合舉辦嘅「香港經濟高峰會議」上致辭，講到佢同意馮國經博士所言，只要香港保持「四大流量」──即貨物、資產、人才與資訊──暢通無阻，香港自然可以繼續發展，要害在「流過的量」，香港不是「流」的源頭，亦不是「流」的歸宿，只需要「四大的量」到香港出出入入，一出一入之間，香港就可以從中得利。
貨物流過香港而去就係轉口，資金流過香港就係投資投機，資訊流過香港，就係展覽（如ITU）、會議、新聞發佈，互聯網平台、電話電訊發達，有此三大「流」，左丁山認為先至會有「人才流」，人才流過香港之速度，有快有慢，一九四九年後，北方知識分子南來，本以為只在香港暫時停留，點知好多人一留就留咗幾十年，益晒香港之教育發展，金融界專業有大量外國專家流出流入，為本地人帶來不少學習機會，好似袁天凡、梁伯韜等都係向流過香港嘅投資銀行家學師嘅啫。
香港只要擺好個平台，以法治、自由為平台地基，四流通過香港，不成問題，香港夠唔夠自由呢？唔係冇，不過近年日漸受到某啲「好心做壞事」嘅人士聲大大咁去逼使政府施加限制，例如為最低工資立法，為公平競爭立法，為種族歧視立法，為GST立法：呢類工作，既增加營運成本，社會摩擦，更無補於增加四大流量。
好彩曾特首都算醒目，佢領導之行政會議卒之順應民意，決定取消GST諮詢，無謂擾民。嗱，選委會之中，起碼有過半數委員來自商界，佢哋會贊成香港引進GST，冇人會信。現在唐司長主動取消GST諮詢，夠晒識做，曾先生第二日去爭取七百零一張選委提名票，即刻輕鬆好多，起碼商界選委再無一致反對曾先生之理由。唐司長咁醒目，留任做財政司司長，好為曾先生擴闊四大流量，你估有冇希望呢！