政府推出嚟嘅嘢有時的確幾詭異。點解咁講？好似公務員事務局早前出咗份諮詢文件畀各工會，突然有個好唔尋常嘅建議，就係建議放棄用咗30幾年嘅公務員薪酬趨勢調查，改用其他私人機構嘅加薪數據作為公務員加人工嘅參考。結果？梗係一開波就俾啲工會隊冧呢個建議啦！
工會中人同八方講，呢單嘢詭異之處在於：咁嘅建議，局方事前又冇同佢哋單聲、又冇摸底，突然拋份文件出嚟，目的好似擺明車馬係想俾人隊冧咁。
如果睇晒成個局，一直都係商界（當然包括行政會議入面嘅商界代表）主力想搞公務員人工問題；但係講到要廢除公務員薪酬趨勢調查，睇嚟公務員事務局都唔想。於是乎事前就乜嘢摸底工夫都唔做就拋個建議出嚟，等啲工會隊冧之後，就可以攞住呢啲彈藥去抗衡商界嘅壓力喇！