中國3G概念股熱炒，除咗3G設備股同埋手機股會受惠之外，原來手機電池股早已靜靜地起革命。最強一隻，當數到今年初股價仲係1.40元樓下，𠵱家已經升到上去接近5蚊，1年升成3倍幾嘅光宇國際（1043），比亞廸（1211）都唔弱，年初股價約莫12蚊，不經不覺升到上28蚊。
點解電池股同3G拉上關係？因為3G電話多媒體用途會多好多，耗電量大過普通2G電話，因此要設計使用時間耐啲嘅3G專用電池，例如光宇供應嘅SLA電池，就係其中一隻。
光宇之所以升咁多，佢嘅成長故事值得睇睇。受累於生產電池嘅原材料價格急漲，公司股價由03年尾開始，跌足2年，跌到落1.34元至停，為解決問題，公司由縱向發展埋手。
月前公司宣布斥資2.72億元收購俄羅斯礦場，礦存主要以鉛和鋅為主，礦場將於08年投產。光宇競投採礦權，因為近年鉛價持續上升，自己開礦可以為公司主要產品SLA電池取得穩定鉛供應量。
連同在今年上半年收購的俄羅斯礦場，兩個礦場所生產的鉛可供應集團SLA電池一半需求，但係光宇仍希望繼續尋求其他鉛礦的收購或投資機會，最終達到自給自足。呢種縱向收購當然唔係咁多公司做得到，但係「窮則變，變則通」，光宇日後原材料不假外求，股價大升唔係冇理由。光宇現價往績PE19倍，比亞廸29倍，計埋縱向收購呢個因素，邊隻抵買就更加明顯。
歐陽風