世貿全方位開放，就連最後一瓣受保護行業──內地銀行金融業，下個星期都大開中門，畀合規格嘅外資銀行進入。咁，開放市場呢家嘢，係全球大趨勢，亦係進步嘅表現，之不過對於內地銀行嚟講，就要打醒精神。
五大國有商業銀行之一嘅建設銀行，佢哋董事長郭樹清已不時呼籲，要求內地加快稅制改革，讓中資銀行享有與外資行同等稅務看待，建行研究部噚日仲專誠出份關於外資行管理條例之下，國內商銀如何提升競爭力同面對挑戰嘅報告。
內地銀行衝擊大
報告裏面好隱晦咁話，條例出台後，外資行喺原來享有嘅「超國民待遇」（例如稅率較低）基礎上，加埋𠵱家業務發展改善至國民待遇，外資行真正實現與國內銀行在同一平台上競爭。
建行報告又講，咁樣會為內地銀行帶來巨大衝擊，業界惟有自強上進，取長補短，發揮優勢，務求喺「競爭中笑傲江湖」。