美股投資者等昨晚公布嘅就業數據，個市觀望氣氛中偏軟，啲評論日日話新增職位個數字好重要，仲話可以睇穿晒美國聯儲局會唔會同埋幾時減息，不過，啲預測數字就好兒戲，幾日前就估增加11萬份新工，兩日前改口話15萬，前晚就改為17萬，根據啲乜嘢嚟估就唔知，但幾乎可以肯定，呢啲「唱定先」嘅手法，多數都有「陰謀」，估得咁高，又愈估愈高，公布嘅數字有幾大機會會符合預期？如果未如預期，咁樣就可以大做文章舞個市上落，睇嚟昨晚美股都唔會平靜。
港股前日嘅走勢咁差，昨日都好難避免繼續跌，恒指力守18700關收市，結果都唔見咗103點，不過，成交繼續縮，50日線又升緊上嚟，技術調整應該已經接近尾聲。
中移動C輪3496：如果大家冇忘記（忘記咗可以去《蘋果》網站睇昔日《蘋果》搵番篇文），俊樺上個禮拜都係介紹大家留意中移動C輪3496，記住係「留意」唔係即刻買，上個禮拜五中移動（941）收63.80元，俊樺叫大家等正股跌落61.80元，見佢守得住就可以買3496，正股昨日就係報收61.80元，最低見過60.75元，喺50日線低少少出現「長尾陀螺」，成交比前日縮咗差唔多一半，炒反彈，此其時矣！3496昨收53仙，比上個禮拜五平咗14仙，槓桿率11.7倍（有效7.2倍），對沖值0.62，正股反彈有機會上試64元，隻C輪到時會見66仙，正股升上66元，3496會見80仙，正股跌穿60元止蝕。
俊樺