緋聞多多嘅馬德鐘，上月同長髮新歡Katherine拖手遊泰國斷正，事後佢嘅解釋連綿不絕，猛話婚姻生活美滿，無綫冇刪減佢喺60集長劇《歲月風雲》嘅戲份，總之公司肯畀機會，自己又會好努力。緋聞纏身都可以講到咁正氣，唔怪得之咁好戲嘅佢，對於失落劇帝獎會咁㷫啦！
自稱工作如常嘅馬德鐘，當正緋聞完全同佢無關。前日佢一支公出巡尖沙嘴，全程戴住副黑超，佢本身已經牛高馬大，行路仲要頭岳岳，成個大明星咁款，所以當佢行去海港城嘅時候，大班途人都對佢投以注目禮，不過馬德鐘照樣扮晒cool，眼尾都唔望吓人。
逛足成個下晝
當時馬德鐘着白西裝襯牛仔褲，拎住D&G名牌袋，先入D&G逛15分鐘，齋睇冇幫襯，然後再喺廣東道行嚟行去，最後去咗周生生睇錶，兩個店員見到大明星駕到，即刻熱情招呼，不過馬生塊面相當黑，全程睇住擺手錶嘅玻璃飾櫃，店員攞咗啲目錄向佢推銷，佢都冇乜反應，結果搞搞震大半粒鐘，都係冇幫襯，最後馬德鐘又去咗JustCavalli，同樣都係得個睇字。
馬德鐘主演嘅新劇《爭霸》就快播出，本來佢有劇出街，又趕拍長劇，應該忙到甩轆，但仲可以得閒到漫無目的逛足成個下晝，唔使宣傳又唔使拍戲，咁佢嘅「工作如常」都幾清閒喎！
