朱玲玲同中國香港體育協會暨奧林匹克委員會會長霍震霆雖然離咗婚，但今屆多哈亞運會，朱玲玲都有陪前夫以及大仔霍啓剛去多哈幫港隊健兒打氣。不過，前日朱玲玲同霍震霆以及個仔睇水球比賽，仲同前夫有傾有講，後來攞支大炮出嚟影相，點知在場工作人員唔識佢同霍震霆係乜水，以為佢哋係普通觀眾，竟然走上前喝止，搞到朱玲玲同霍震霆好鬼尷尬。
入後台再被阻
賽事完咗之後，霍震霆又帶埋朱玲玲入後台探望港隊成員，點知又俾大會職員阻止，真係有眼不識泰山，難怪霍震霆㷫到死死吓，後來大會知道呢件事之後，即刻同佢道歉，霍震霆先至順番條氣。
馮仁昭噚日打電話問番霍震霆呢單嘢，佢話：「佢哋好多分工唔係好清楚，後尾都搞番掂，希望佢哋做好啲啦！不過，整體嚟講都算唔錯㗎啦！」馮仁昭本來想問吓佢同朱玲玲復合傳聞，但未開口佢已經好快收咗線！
