多哈亞運冇乜人注意，報紙報導唔算多，同世界盃比，差幾皮，偶然睇到有線電視報導嘅畫面，只見現場觀眾稀疏，足球、游泳呢兩類，叫做有啲吸引力，現場都係見到好少人啫噃。好彩卡塔爾有石油出口，辦一次亞運，蝕大本又點話。西報有一幅女子沙灘排球賽嘅圖片，十分噴火，就係日本代表穿上超細比堅尼出場，Japan呢個字冇地方擺，只能印在三角褲之屁股部份，呢位女選手偏偏身材玲瓏浮凸，加上超細比堅尼，於是多哈之本地女士不得入場參觀。只准多哈男士入場，但遊客當然例外，好彩比賽地方係多哈，唔係德黑蘭啫。
大概因為○八年奧運馬術賽在港舉行，有線特登先做足工夫，轉播馬術賽呢個項目，搵邊一位評述呢？吳嵩是也，香港確係好難搵到正宗馬術評述員，既然吳嵩係「傷健策騎協會」理事，負責公關宣傳，近幾個月頻頻惡補騎術賽方面嘅知識，於是拍吓心口就上。好彩此人聰明絕頂，英文又掂，惡補之下，講得有紋有路，但一個人唔夠㗎，兩年後點算呢？口齒伶俐，對住鏡頭唔會口窒窒，對馬術有興趣有認識之才俊，請你哋試吓！
吳嵩近日更為「傷健策騎協會」（RidingfortheDisabledAssociation）籌款而撲來撲去。RDA從來唔夠錢用，現在為咗配合奧運馬術賽，在在需財，更加要四圍撲水。馬主Y之HongKongBreedersClub出手相助RDA，趁聽日香港有國際大賽，外國育馬場（StudFarms）高層雲集香港，一於喺星期一（十二月十一日）在山光道馬會會所辦慈善午宴，每席GoldTable收費五萬元，所得扣除開支，捐畀RDA，同時頒發2006年香港最佳育馬者（Breeder）獎畀一位本港馬主。馬主Y人面廣，出錢出力，搵埋公關大姐大幫手搞呢場慈善午宴。大姐大對馬主Y讚口不絕，話佢做事明快，親自出馬搵贊助，𠵱家已搵到德意志、愛瑪仕、瑞銀、法國巴黎、瑞信等等，以及澳洲、紐西蘭、愛爾蘭各地嘅育馬場幫手贊助，他日RDA嘅選手如在○八年傷殘奧運馬術賽攞到獎牌，馬主Y應有一份功勞。