梁大狀今次落場選特首，硬撼煲呔，畀人知不可為而為之嘅感覺，勇氣可嘉，同第一屆特首選舉時都有落場試腳嘅前上訴庭副庭長李福善，一樣咁有吉士。
李官接受新一期《A45》訪問時講到，當年原本無意去選，但當時因為羅德丞臨陣唔玩，仲話有埋班底畀佢，咁李官就即管試吓，佢覺得有競爭係好事，至少畀當年嘅推委有多個選擇。
但好多人喺壓力下都唔可以隨心所欲，據知當時好多應承畀票李官嘅人，最終都轉軚，令佢最後只攞到43個提名，差少少先夠入場要求嘅50個提名，難怪佢講起嚟都好似耿耿於懷。
但係李官特別澄清，當時落敗之後面對廣大傳媒，好多人以為佢眼泛淚光，查實自己係笑晒至真喎。點解？佢話至少呢一場戲畀佢睇清楚人性，即係應承咗你嘅人，未必一定會撐你，反而有啲人唔使叫都投票畀你。呢幾句咁玄嘅說話，唔通係特別講畀梁大狀聽嘅？