新股認購熱潮席捲全城，近期新股幾乎逢抽必賺，每當公布新股認購結果，股民最緊張當然係抽唔抽到及中幾多手。噚日建滔積層板（1888）公布配售結果，喺《香港討論區》嘅心急網友ab123ab話：「啲老友喺中銀網上入黃表認購建滔積層板，已經知道抽唔抽到，但自己喺獅子行入黃表認購，就仲未知，打去熱線問，話要7點後先知道，個個都知得我唔知，真係好心急……獅子行冇鬼用！」
本報致電滙豐服務熱線查詢，解釋獲配發的新股於下午陸續存入客戶戶口，非同一時間完成，但結果最遲喺晚上7點前完成。銀行要收到股票先可以通知客戶，若果散戶想最快最準睇到抽唔抽到新股，應該直接去港交所官方網站www.hkex.com.hk，主頁右上角會有「新股配發結果」一欄，click入之後核對身份證號碼，就知中唔中獎，有關結果可一早喺網上查閱。
滙豐、中銀SMS通知
另外，滙豐及中銀有為認購新股嘅客戶提供免費電話短訊（SMS）通知，一有結果即時通知客戶，但服務只限於填寫表格時預先登記嘅客戶，而且電話號碼只限9字或6字頭。