香港人成日埋怨地產商無良，起埋啲縮水樓，又賣到豪宅咁貴，有網友忽發奇想，公開呼籲有意置業人士，一齊集資買地起樓，估唔到引來網民熱烈迴響。
mrraylo喺《香港討論區》提議︰「一齊集資買地起樓自己住，咁咪唔使俾地產商吊高嚟賣囉，大家覺得有冇得諗？」
dbp、eddieywlee、pandadadada、tswapex等紛紛表態支持，但dbp提出兩大問題︰「1.個個業主嘅要求都唔同，點樣設計法？點決定邊個可以要邊個單位？2.未勾地銀行冇得貸款，業主點借錢買地同起樓？」佢仲話，如果解決到呢兩個難題，樓市就真係可以由「業主主導」，其他嘢包括建築、監察、管理都唔成問題，可以外判出去做。
憂建築不熟 法律亦唔識
不過，佢哋嘅構思亦遭到唔少網民潑冷水，wilsonli話︰「1.香港地價貴，我哋就算每人夾500萬加埋都唔夠。2.你買咗地冇理由只起10至20層啩（每層8個單位）?!樓愈起得高，成本才分薄，有咁多人夾錢嗎？3.買地事小，其他費用先至大，何況我們對建築不熟，當中的法律又唔多了解……」
搵夠10兄弟 集資5000萬
正當大家沉醉喺呢個春秋大夢之際，treo000就好清醒咁講︰「香港係一個分工合作嘅社會，唔同範圍嘅人做唔同嘅事。雖然我都覺得啲發展商賺得好過份，要怨就怨自己點解唔係李嘉誠個仔！」
其實呢班網友並非癡人說夢，不是所有勾地表內的地皮成交價都過億，根據資料顯示，今年7月，德興集團以3050萬元投得大嶼山一幅2.411萬平方呎蚊型地，地積比率0.4倍，即可建9645平方呎樓面，投地前估值1000萬元。當時德興集團主席陳樹傑話，最多可建6幢洋房，每方呎成本約5000元。以此計算，項目總發展成本4822.5萬元，若如wilsonli所說，每人集資500萬元，大概找9至10個人便湊夠數。
現時在勾地表內類似的地皮尚有一幅位於坪洲、可建樓面1.95萬平方呎的地皮，估值1600萬元，可建單位20個。