海域爆煲後唔少董事跳船辭職，引發市場關注董事責任問題，立法會議員當然唔會放過問責機會，噚日劉慧卿就以書面質詢馬時亨，究竟有冇監管？
據政府回覆的統計數字，過去三年，有52家被停牌的上市公司陷入財政困難，其中5家公司至少有1名獨立非執行董事喺停牌前一個月內辭職，相信海域係其中之一；又有10家公司至少有1名獨立非執董會喺公司停牌後一個月內辭職。
罰則未夠辣
肥馬回覆話，港交所嘅上市規則規定，上市公司必須公布董事辭職理由，呢方面比英國、澳洲及新加坡更加嚴格。
規則又訂明董事要履行誠信責任及勤勉盡責，若果故意唔履行責任，港交所可施加制裁，例如公開譴責。聽落呢啲罰則唔算好辣，因為如果間公司有法律訴訟而要上身，咁梗係走為上着，俾港交所譴責吓又算得乜？