英超兩頭馬車曼聯、車路士跑出已成不爭事實，球場鬥生鬥死，乃注定死敵，但係球場外，原來都係「死敵」，不過只限於虛擬世界！據英國傳媒報道，車仔同紅魔陣內唔少球員，包括費查、林柏特、泰利、奧沙等「2字頭」球星，都為PS2戰爭game《Socom：USNavySeals》着迷，經常在網上互片，近日仲喺場上向對方示威㖭！
唔知各位善忘嘅球迷仲記唔記得，上周中曼聯大數愛華頓3:0嗰場聯賽，入到第3球時，奧沙、基蘭李察臣等就突然單腳跪低，扮托住碌炮「開火」，原來呢個姿勢就係嗰隻《Socom》遊戲中，各位兵大佬嘅英姿，所以班紅魔就特登做個樣出嚟，挑釁吓班經常喺網上開戰嘅車仔仇家咁話！
泰利猴擒想玩試版
上周六曼聯擊敗米堡一仗，里奧費廸南同費查又做呢個托炮姿勢，實行嚇一嚇車仔班機友！Sony更有人爆料話，車仔隊長泰利更派經理人聯絡佢哋，希望盡快拎到呢隻遊戲嘅最新試玩版，你都咪話佢唔猴擒呀！
「喂，今晚上網打機啦！」求大俠行街聽到啲小朋友講打機，成日都想勸佢哋打少啲、多讀書，但係我知道原來喺球場上嘅富豪球星都沉迷電子遊戲，就忽然間覺得周時匿埋喺屋企打機個死仔都好有希望。
「估唔到車仔同紅魔班友仔咁大個仔都沉迷電玩呀，呢啲小玩意果然係不分年齡、性別……等求大俠今晚都買隻嚟玩吓先！」