到九龍香格里拉酒店聽二○○六年諾貝爾獎經濟學獎得主EdmundPhelps演講，宴會大廳全場爆棚，司儀仲話有聽眾坐在其他房間睇直播。睇嚟新鴻基地產贊助中文大學舉辦諾貝爾獎得主講座系列，相當成功，對公眾教育十分有貢獻，當日在座嘅唔淨止係新地友好，大學教師，左丁山見到有好多中學生在座，發問時，更加以學生為主，一位中學生發問，講英文仲清楚過後來一位中學老師嘅發言。
Phelps去斯德哥爾摩出席諾貝爾獎頒授儀式，唔直接由紐約飛去瑞典，特登飛咗嚟香港再去瑞典，用多唔少時間，究竟為乜？原來係一石二鳥，既為中大演講，亦為咗出席中大為另一位諾貝爾獎得主，未來中大晨興書院院長（Master）莫理斯教授而設嘅七十歲論壇與壽宴，北京大學亦有份一齊搞。北大光華管理學院院長張維迎（WeiyingZhang）教授就係莫理斯教授嘅牛津學生。Phelps與莫理斯（JamesMirrlees）交情深厚，故此轉半個地球嚟香港行吓，他日中大晨興書院落成，只收三百名宿生，啲學生有福咯，日日有機會向莫理斯教授請教，人都會醒好多。人生教育過程之中，除咗讀書研究之外，最緊要見識多啲世界級高人，呢啲叫做exposure，有錢未必一定可以買得到，中學生出席「新地諾貝爾獎傑出學人講座」，就係爭取Exposure嘅第一步，將來練好啲英文，入中大晨興書院與莫理斯教授對談，肯定一生受用無窮。
演講完畢，科大Ｌ教授對左丁山講，𠵱家好少專欄識得寫簡潔易明嘅經濟專題嚟教育大眾，佢要左丁山寫多啲，唔識就問佢，唔好寫咁多賽馬。Ｌ教授擅寫大塊文章，對世貿、最低工資等專題，手起刀落，羅列理論、數據，極有說服力，佢啲對手根本唔係嗰皮，所以左丁山請佢寫多啲，益吓香港人，左丁山執人口水尾，邊有咁多料吖。Ｌ教授叫左丁山唔好寫馬，唔寫唔得嘅，就住吓啦。日前到六國飯店，離開之時一位經理猛話，睇左丁山寫馬好過癮，不妨寫多啲，你話點好？