日本車不斷蠶食美國車廠嘅市場佔有率，搞到通用汽車（GM）、福特同克萊斯勒嘅業績全部見紅，要想辦法吊命。福特更有史以來首次以資產抵押嘅貸款方式，籌180億美元（約1400億港元）救亡。
有衞道之士LikeItIs睇唔過眼，喺《MSNBC》上呼籲網友唔好再買外國車，否則本地薑好快玩完。
不過，大部份網友對佢嘅提議唔多受落。ESimpson大潑冷水，讚外國進口車價錢平又好用，美國車要贏就先要提高質素同降價先！
美國及歐洲車的確「唔爭氣」，美國商業雜誌《福布斯》公布，當地今年銷售最佳嘅汽車，全係日本車，包括豐田Camry、Corolla，本田Accord、Civic等。
Elrick認為，美國車要同過江龍爭一日長短，應該先解決成本過高嘅問題。美國車廠工會勢力過大，工人福利太好，時薪成30蚊美金，啲車嘅款式又老土，試問咁又點會夠人爭吖！AlPla講得更加尖酸刻薄，佢話車廠再唔整架似樣啲嘅車出嚟行，不如快啲「摺埋」算啦！