ITU呢個由特區政府傾盡奶力爭取嚟搞嘅盛事，噚日進入第三日。有幾「盛」？真係唔入到去邊疆咁遠嘅亞洲博覽館都feel唔到，但可以肯定，華華同埋班行家「心火盛」就一定有！
嚴密保安僅次吳邦國
話說李澤楷噚日百忙中，為呢個電訊界奧林匹克撐場，朝早先嚟一場forum講點樣delight客戶，下晝再響YouthForum同嚟自唔同國家嘅青少年，互動分享。由於主辦單位認為二少係極度VIP，地位僅次於吳邦國，所以採取嚴密保安，由鬼佬保安阿頭親自招呼。不過，呢位阿頭可能冇見過傳媒點追訪二少，竟然出現一手執着記者心口──個pass，呼喝唔准追嘅暴力場面。
到下晝，主辦單位見二少特別惹火，於是唔畀傳媒入內旁聽，大家惟有響場館門口呆企，向出嚟去廁所嘅同學及嘉賓收料。不過，一名話自己係YouthForum話事人嘅黑人女子，阻止嘉賓同記者傾偈，講明forum任何資料都唔可以同記者講。呢位黑人姐姐仲話，小小超15分鐘前已經走咗……照推斷，由秘道鬆人嘅二少，一係識得元神出竅，否則就係大家時運高乜都睇唔到！
最好一part係去廁所
至於黑人姐姐視為最高機密的YouthForum有幾精采？根據與會嘅同學報告，首先，大家唔知RichardLi係邊個；第二、唔知個主題係想分享啲乜；第三、二少問非所答，所以好多人瞓咗；第四、最好一part係出嚟去廁所。
咁點解一向深得同學歡心嘅二少咁失策問非所答呢？例子之一，係有人問二少NATO（北大西洋公約組織）究竟扮演乜角色……試問二少點會唔帶你暢遊碧桂園呢！