有啲嘢叫做一沉百踩，繼黃秋生批評完陳凱歌嘅《無極》拍得爛同張藝謀唔識拍武俠片後，早前喺威尼斯影展憑《三峽好人》捧走金獅獎嘅第六代內地導演賈樟柯都走嚟湊熱鬧，佢批評包括張藝謀在內嘅第五代導演拍商業片冇才華。
批張藝謀唔夠放
賈樟柯借張藝謀執導嘅《十面埋伏》嚟講，佢話：「個人風格改變是主觀，是可以去嘗試的，但有沒有實際能力去做好，就是另一回事了。中國那些大導演根本沒有拍商業片才華，商業片需要的是想像力以及商業文化理解能力。我們那幾個大導演對新技術不信任、不認同、開放性不夠，有很大的局限性，怎麼可能有拍商業片的才華？」
賈樟柯喺呢個時候去批評張藝謀，唔知會唔會因為佢部戲同《滿城盡帶黃金甲》一齊上映有關呢？有記者問過佢，擔唔擔心同《滿》片較高下？佢話：「我和發行商為上映期爭執很久，他說我簡直是在用國內市場票房來殉情。我答他就讓我殉情吧！」
另外，周杰倫早排為自己有份主演嘅《滿城盡帶黃金甲》主題曲拍MV，雖然係古裝片，但佢以別樹一格嘅rock嚟rap佢唱呢首歌，而MV拍攝場景就用咗個價值400萬港元嘅宮廷景嚟拍，都算落足本啦！
