唔經唔覺，大家樂已經上市20周年，呢家港人飯堂都算有企業良心，第二次送股票畀長期服務員工，無論係收銀小姐定係管理高層，只要喺大家樂做咗20年，都會攞到大家樂股票一手。股票喺今年7月16日已經過咗戶畀員工，當日股價11.35元，到噚晚收報14個6毫4，短短5個月升咗近3成。
班員工個個拎住張股票都好似執到金咁，其中一位俾記者圍住做訪問嘅荃灣分店經理郭先生，成為大家樂一分子已經超過25年。佢拎住張股票簡直唔肯放手，猛讚公司前景好，一定長揸唔放，留嚟做紀念咁話。華華屈指一算，張股票值成3萬蚊，差唔多等如一般打工仔3個月人工，股價仲連續20年係咁升，真係好過出雙糧喎。
下年大家樂就踏入成立40周年，主席陳裕光會唔會再送股票，佢就笑晒口話：「往年生日都有啲禮物派嘅。」仲話想班員工「成為另一批百萬富翁」，睇嚟陳生都算係良心僱主。