模特兒出身的楊崢近年進軍司儀界，在無綫先後主持《更上一層樓》和《星級廚房》，她向來把鄭裕玲（嘟嘟）當做偶像，更希望將來能像嘟嘟姐一樣在司儀界有所成，為此她已決定明年去外國進修，讀一個短期的主持課程。
名模楊崢主持的《更上一層樓》節目大獲好評，無綫已決定添食再拍新一輯13集節目，楊崢日前接受本報訪問時透露這個節目對她來說意義重大，因為是她在無綫主持的第一個節目，她說：「其實郭可盈都主持過呢個節目，我自己鍾意睇樓，而且呢個節目形象又好，我好有興趣繼續做，我將之前自己主持嘅一輯當係seasonone，希望可以一直添食落去，有10個season就好喇。」
寫專欄出書
在《美女廚房》節目贏得亞軍，令大家知道原來楊崢煮得一手好餸，無綫也邀請她主持《星級廚房》，除了煮餸外，楊崢亦喜歡寫作，曾在報章雜誌寫專欄，02年底曾推出《2555天》，講述她在模特兒界的成長經歷，可以說是多才多藝。
楊崢向來視鄭裕玲為偶像，她也希望自己在主持方面能有更大的發展，所以決定明年到外國進修，她說：「我好記得台灣主持人陶子（陶晶瑩）講過，做司儀要做得放唔難，最緊要係識得幾時要收。呢幾年嚟我做過唔少發布會、大型晚會嘅司儀，不停都學到嘢，嚟緊07年我會去外國讀一個大概三個月嘅短期課程，主要係學有關司儀講嘢技巧，希望朝住呢方面發展。」
兩事業並存
做主持人比做模特兒長壽，不過楊崢並沒有打算放棄模特兒事業，她說：「我做模特兒已經十年，所以唔會放棄呢個身份，都有人問我怕唔怕出邊啲人以為我轉做電視台，唔再做模特兒，但亦有朋友同我講話，楊崢一行出嚟就已經係模特兒，根本唔需要擔心呢樣嘢。」
採訪：張止寒
攝影：林德雄
場地提供：Habitu
服裝提供：YSL
髮型：NickyWong
