今年新股王非玖龍紙業（2689）莫屬，皆因3月招股只係3.4元，一路穩步升至最高14蚊，雖然最新回落至13.1元，但成交額仲有1.47億元，依然強勢！睇見紙品股咁掂，散戶當然繼續尋寶。網友stone噚日就喺《公眾投資168綜合論壇》帶頭推介「衞生巾」概念，佢話中港兩地女士愈嚟愈多，同樣最愛有嘢送，廠家除咗生產M巾之餘，仲可以做埋避孕藥、經痛貼、保健食品等等副產品，甚至踩過界同胸圍商聯營，然後綑綁式銷售，估計上市嘅話，市值隨時勁過玖紙喎。
鄧聲興：恒安上望20元
冇錯，假設女仔十零歲開始M到，到五十歲更年期，一個月起碼用M巾十塊，𠵱家中港分別13億和700萬嘅人口之中，「適齡」顧客合計至少有4億幾人，市場潛力優厚。唔講唔知，香港真係有一千零一隻嘅「衞生巾股」恒安國際（1044），呢隻98年上市嘅台資股份，除咗製M巾，仲有紙尿片，及大家一定見過嘅「幾米」紙巾同「便利妥」膠布等產品。06上半年中期營業額為20.38億元，M巾業務佔4.58億元，毛利率達54.7%，04及05年度有關數字僅為46.4%及52.5%。
恒安噚日收報18.5元，市值200億元，為玖紙嘅64.1%。東泰證券鄧聲興表示，恒安𠵱家喺內地嘅衞生巾市佔率達20%，冠絕業界，而近年開發嘅高檔M巾亦漸見成績，加上受惠於紙漿價格平穩，估計該股目標價可望20元。