為避開直播場次，今次波膽過關搵嚟4場英甲賽事玩吓。
黑池今季主場聯賽9戰，只係得一場能夠保住清白之身，其他8場全部有失波，防守力麻麻，但勝在戰績穩定，近7場主場聯賽就未嘗一敗，錄得3勝4和；相反車頓咸作客表現不穩，最近又被英冠班士利撬走韋斯咸出身嘅中場格蘭麥肯，實力大倒退，今仗料難逃一敗，可敲黑池勝2:1。
唐卡士打「和波專家」
上季爭升班功虧一簣嘅諾定咸森林，今季表現對辦排榜首，近6場聯賽5勝1和，當中3場作客波有2勝1和。今周中作客排名下游、近6場聯賽輸5場嘅般尼茅夫，睇嚟又可繼續全取3分，可敲森林小勝1:0。
尾2球隊賓福特主場迎戰唐卡士打，睇賓福特今季表現，護級前景唔太樂觀，連續13場聯賽不勝；但佢哋喺主場都叫做有一定搶分能力，9戰只輸過3場，只係成日和波失分。唐卡士打正係目前英甲聯「和波專家」，博1:1可也。
「包尾大幡」奧連特今輪迎戰巴拉福特。其實目前以18戰得15分嘅奧連特，僅落後尾5球隊車頓咸3分，但少打一場，今仗只要贏波，隨時彈出降班區域；奧連特今季主場聯賽9戰亦只輸過兩場，巴拉福特客場聯賽兩連敗，不妨捧奧連特小勝1:0。
文：華度