沙基穆罕默德係何方神聖？球迷同我求大俠都未必聽過佢個名，但佢就係全球其中一個最有米嘅億萬富豪，並擁有一個喺阿聯酋城市杜拜，叫DIC嘅大財團。呢個財團將斥4.5億英鎊（約69億港元）巨資，收購英超老牌勁旅利物浦，同美國人擁有嘅曼聯同俄羅斯人擁有嘅車路士，喺球場上展開「第三次世界大戰」！
DIC總裁艾安沙尼表示，佢自小就係紅軍球迷，覺得集團嘅長遠投資，將有望增強紅軍喺場內外嘅競爭力；而該集團嘅後盾，就係全球其中一個最有米嘅富豪沙基穆罕默德（據英傳媒估計身家逾60億鎊），佢仲係阿聯酋副總統，政商關係千絲萬縷！DIC注資嘅4.5億英鎊中，包括2億鎊拎去起新球場，1億鎊用嚟做轉會費，實行同車仔喺轉會市場拗手瓜！
賓帥前程似「咁」
雖然紅軍今季聯賽戰績麻麻，但主帥賓尼廸斯似乎毫無危機感！對自己帥位充滿自信，仲話對收購表示歡迎；但我求大俠闖蕩江湖多年，睇見每次球會被收購後都會大執位，只係即刻執同遲少少執嘅差別。除非賓帥今季可以拎個大賽冠軍，唔係睇怕都要搵定後路喇！
時下興收購球會，早前韋斯咸就被冰島財團買咗、加埋曼聯、車仔、樸茅等球會，連保加利亞班霸索菲亞中央陸軍，都俾印度富豪瞄準，可預期各大聯賽嘅球會，遲啲都會成為富豪嘅「活寵物」！
「當曼聯、車仔俾富豪買咗後，紅軍俾人收購都算係意料之事，但係咪有錢就得呢？紅軍粉絲係時候寄信去反映吓意見喇！」