影視界巨亨邵蛇，幾乎成為全球首位百歲上市公司主席，最近至話，同個大仔關係破冰，事業王國有望後繼有人，但係細呀蛇一半嘅牛奶仔牛根生，繼舊年捐身家後，今年又嚷着50歲時，即係08年，就將蒙牛（2319）個總裁寶座都讓埋出嚟。
呢位來自內蒙嘅牛佬好灑脫話：「世界上少了任何人都冇問題，蒙牛少了任何人，都一樣會向前發展」，但前提取決於三方面，一係大環境發展情況；二係接班人選擇情況；最後係企業制度建設情況。
吃虧是福 便宜是禍
點解咁捨得呢？原來佢有理論支持，亦有個人經歷影響。牛佬話，據美國蘭德公司估計，世界上破產倒閉嘅大企業，八成半係企業家決策失誤造成，佢認為，中國企業尤其如此，所以蒙牛要將高層職位斬件，各行其權，但又互相制衡喎。
至於個人經歷，牛佬響佢新開嘅blog，講咗前半生畀大家知，原來佢BB時因家貧，生父用50蚊將佢賣畀隔籬村一家姓牛嘅養牛人，養母曾經有個錢，但當然最後係見盡世情、捱盡鹹酸之後，至得以一家團圓個隻啦。
佢發迹後，謹記養母訓誡，「吃虧是福，佔便宜是禍」，一於奉行「夠使就算」政策，將錢同權位讓出嚟，而且唔係得個講字，話做就做，真係值得一讚。