可能有人覺得Xbox360都出咗成年幾，新鮮感硬係爭啲，但喺外國廠商眼中佢先係真正啱晒合尺。唔使講其他，單睇「法蘭西第一Game廠」Ubisoft就知，餐餐都俾360飲頭啖湯，仲要次次都叫好叫座，難怪機迷玩得Happy佢又賺到笑。今次「虹彩六號」又係先出360版，再對應埋WebCamScan個樣上去，當正自己拍《飛虎雄心決戰拉斯維加斯》咁款，真係諗起都忍唔住手，嗱嗱聲操番幾鋪先！
文：陳福榮
《RainbowSixVegas》係「虹彩六號」第6集，故事與舞台都保留原作者TomClancy嘅一貫認真風格，即使將會出PC版，但手感同開發骨幹都係以360版作依歸，所以到時鍵盤加滑鼠嘅組合未必及得上手掣，情況有啲似《Halo》咁。至於PS3同PSP方面，由於要等到出年唔知幾時至出，既然上Live搵對手挑機嘅程序方便到暈，全球各地高手雲集，有心同人過番兩招就千祈咪再等，應該盡快入貨練功，否則到時蘇州過後冇艇搭咁就唔多好啦。
影低個樣網上隻抽
今次共有8種唔同嘅連線玩法，其中「你攻我守」同埋「合作故事」係全新引入。呢次網上對戰模式比之前做得更好，包括任人改變武裝配搭、轉換裝束迷彩圖案以至更有意思嘅排名系統。通過不斷進行對戰，玩家能夠賺取經驗值提升等級，藉此追加新嘅武器同裝備，但佢只會令個Look睇起嚟特別啲，並唔會有明顯嘅優勢，咁先至能夠維持住成個Game嘅平衡度，冇得大蝦細，要靠真正實力一決高下。
論創意，就肯定及唔上對應WebCam咁盞鬼。事關廠方都知唔少機主之前都買咗眼仔，用嚟同朋友玩吓UNO，但若然將自己個樣整入個角色度，肯定玩起嚟會更有投入感，始終冇人想自己咁易俾人辣低㗎嘛！
然而要留意鏡頭個靈敏度都係稍欠，有人試過要拍多幾次先至搞得掂，希望第時啲Game可以輕鬆啲啦。
連線玩 畫面差
故此今集改為發生喺五光十色嘅拉斯維加斯呢個銷金窩度，起碼外面有大量霓虹燈照住，裏頭亦有唔少光源屬好大對比嘅賭場設施，加上視線範圍內有唔少嘢都可以破壞，而且為咗令遊戲節奏冇咁易被打斷，唔會喺版面途中播片講古仔，只是略嫌難度頗高，打慣呢類作品嘅朋友都唔易克服，佢每關設置嘅CheckPoint又似乎偏少，冇咩耐性嘅朋友或許會俾佢好快搞到意志消沉，繼而熄機。
隻Game響連線同單人玩嗰陣，畫面係有幾明顯嘅差別，相信都係為咗遷就運算同顯示速度而做嘅決定，雖然結果冇咁完美，但點都好過對戰時不斷咁窒咁肉酸吖。
唔郁補血似《GOW》
話晒係《RainbowSix》，元素係同過往一脈相承，都要喺任務開始前安排好行走路線。今集嘅體力設定，係引入咗類似《GOW》同《COD2》嗰種回復方式，保持響原地不動一段時間就會慢慢治療傷勢，等大家條命可以襟玩啲。
不過話雖如此，佢依然保留咗Headshot呢個特色，一兩槍就會釘蓋，確實係真實中尋求一點進化。
視點仿效咗現時開始流行嘅TPS（第三身射擊），大部份時間都係玩主觀，但響個角落度亂開槍或者趴低，就會變成第三身視點。
另一方面，縱使敵人數量係比以前減少，不過佢哋啲AI醒咗，冇以前任人打咁低B，仲識得兜路抄捷徑嚟陰你㖭，一個唔留神隨時俾人從後攔截，認真麻煩。不過點講都好，佢嘅改變係正面多過負面，如果唔係咁正嘅話，各大外國遊戲媒體又點會齊齊畀佢咁高分呢。
機種：Xbox360
廠商：Ubisoft
類型：FPS
人數：1-16人
推出日：發售中
價錢：$299
