聖誕節普天同慶，大人細路都開心，老人家又如何？和記黃埔就好抵讚，今年喺旗下香港仔中心廣場，亦即全區最多耆英聚腳嘅地方，擺放一座15呎高巨型聖誕音樂木馬，搞吓氣氛。
佢哋仲將呢個布置名為「冬日歐陸奇幻聖誕」，設計係仿照歐洲遊樂場旋轉木馬，除咗彩色駿馬，仲有可愛小鹿、慈祥聖誕老人同得意小孩等裝飾，加埋音樂裝置，定時播放聖誕音樂，對於一眾公公婆婆而言，簡直係一流嘅視聽享受，點都好過齋坐屋企咁悶。
木馬裝飾會擺到出年1月2日，時間都唔短，提醒各長者街坊，若然家有細路，記得喺今個月16至25日，逢星期六、日同公眾假期，帶埋佢哋嚟呢度，到時會有聖誕老人出現，或有機會同聖誕老人影相。
此外，聖誕老人亦會到各期商場，派糖果畀小朋友。