港股噚日再反彈，雖然恒指上唔番19000，好彩期指夠強勢，收市報19070，高水126點，仲補埋上星期二個下跌裂口。中資股仲勁，H股指數連續第5日上升，噚日收市價創歷史新高，報8758，升182點，其中H指成份股中電信（728）爆升15.6%，令人歎為觀止。
人人放時佢就升
中資股咁升法，唔想高追強勢股，惟有向落後股埋手。話明落後股，當然仲未踩油，上得車就預咗要等。咁多隻落後股，揀邊隻至啱？根據網上留言，發覺唔少散戶對中海油（883）情有獨鍾，大概可能係因為中石油（857）噚日升穿10蚊大關，再創歷史新高，中海油仲係冇乜聲氣，噚日收報6.85元，升8仙。
《香港討論區》內，100millionhkd吐苦水：「班大戶好努力壓住我隻中海油。」
skwbjai2叫佢唔使擔心，因為中石油已經開車，好快輪到中海油，佢相信今次升上嚟可以見7.40元。
尼古拉伯爵喺另一條tread回應另一網友時話：「資金輪流炒，你等等啦，一陣你忍唔住手放咗，佢又升㗎啦。」polyman亦認同：「啲人冇耐性，個個放嘅時候，就係佢升之時。」
明年產量增長9%
目前3隻喺香港掛牌嘅中資油股中，中海油近呢幾個月遠遠跑輸中石油同中石化（386），其中一個原因係中海油有9成以上盈利來自上游業務，油價自8月起由高位回落，對中海油影響最明顯。不過，花旗上星期四發表報告，指公司長遠增長前景正面，但短期因為預期第4季營運數據及下半年業績將令市場失望，故只給予「持有」評級，目標價7.4元。
中海油旗下嘅流花油田受颱風影響，減少油產量，但集團積極向外收購油氣田，加上近期喺中國海域發現多個油氣田，預期明年油氣產量增長9%，較中石油同中石化為高。
走勢上，中海油股價出現圓底收集形態，喺未有大成交出現前，股價料喺6.70至7.18元之間上落，一旦突破7.18元，量度升幅可見8.20元，好倉以6.55元止蝕。
余文