獅子行亞太區個人理財業務服務及銷售主管區佩兒噚日出嚟見記者，但咪誤會，唔係個人理財有新產品，而係做代表攞獎啫。上周六喺社會福利署2006年義工嘉許頒獎禮上，獅子行第六度獲頒發最高服務時數獎（私人團體組別一）冠軍，今年已是三連冠。佢哋一班員工喺05年一共用咗48,657.25小時，參與社會服務。
區佩兒話，經過咁多年來，各部門職級的同事積極參與做義工，令呢樣嘢成為咗企業嘅文化。佢仲話，如果員工有需要喺工作時間參與社會服務，銀行亦會配合，例如之前曾經支持同事參加守望地球組織嘅環保工作，而提供兩星期額外假期。華華都希望佢哋呢種企業文化可以「傳染」到其他企業。