今晚焦點賽事巴塞對雲達不來梅，我會覺得係兩大天才中場嘅表演，你會撐朗拿甸奴定係廸亞高？我就撐廸亞高啦！
「細哨」出名，表演慾又強，睇佢踢波夠娛樂性！不過，巴塞後防時有失準，加上前面鬧前鋒荒，我有啲擔心！相比起雲達，中場同樣有巴西大腦廸亞高，實際、低調、唔浮誇，名氣雖不及「細哨」（只限香港，其實喺國內、歐洲，有唔少評論認為廸亞高比「細哨」更重要，因為佢助攻又助守），拍住高路斯，狀態甚佳，仲有就係廸亞高啲死球都幾高質?!我深信雲達同巴塞打成平手！
紅魔入球開大
另一場焦點，當然係曼聯對賓菲加，宿敵對決，所有恩恩怨怨都靠呢場波解決！仲記得上年差唔多呢個時候，同樣係歐冠盃小組賽，同樣係最後一輪，同樣係賓菲加對曼聯，紅魔最後係以1:2輸波出局。
雖然聽晚係紅魔主場，不過我諗會係五五波，賓菲加上場贏士砵亭，我估近況OK啩，大家無得睇，都係靠估。一於用直覺、第六感，有時都幾準㗎，呢場我要入球大！
周鵬
商業1台《球迷集中贏》主持
電郵：[email protected]