噚日滙豐網上銀行服務臨近尾市時死機，影響唔少散戶，令佢哋唔能夠趁收市前進行即時買賣交易，因而蒙受損失，有網友強烈要求滙豐資訊科技總監辭職及作出賠償。《香港討論區》網友shatinshatin話：「滙豐網上理財真係好有問題，經常死機（噚日尾市又發生），落盤又慢，佢應該要賠錢畀用戶，而IT總監亦需辭職。」
另有網友對滙豐收費貴、服務差，表示非常不滿，網友stockwinner指：「佢（滙豐）個買賣股票系統好難用，收費又貴，我用過1次以後冇再用。」網友ELF79相當同意：「成日個市一旺就死機，但收費又唔係平，偏偏又咁多人用。」網友jszewin更指：「佢作為世界級銀行，但服務就係本地銀行最差，經常死機，想更改落盤價都唔得。」
滙豐：未接獲死機報告
對於滙豐接二連三嘅死機事件，唔少網友對佢嘅網上銀行服務失去信心，建議轉用其他銀行服務。網友toyota2006話：「佢真係不可信賴！倒不如轉用其他銀行進行買賣，方為上策。」網友simon7878更建議：「用交銀好過，既穩定，又唔收儲倉費。」不過，滙豐銀行發言人接受本報查詢時話，噚日冇收過任何有關網上銀行「死機」嘅報告。